Bravo, Abramov!

O‘zbekiston milliy terma jamoasi Yamanga qarshi bahsda muxlislarni xursand qildi. Chiroyli o‘yin, ajoyib kombinatsiyalar va eng asosiysi ishonchli g‘alaba. Gollarning rangbarangligi ishqibozlarni xushnuq etdi.

Terma jamoamizning boshlang‘ich tarkibi e’lon qilingach aksariyat odamlar Vadim Abramovning qaroridan hayron qolishdi. Sababi oxirgi yillarda avvalgi darajasidan pasaygan Jamshid Iskanderov va so‘nggi pallada olimpiya terma jamoamizdan bosh jamoaga o‘tkazilgan Sanjar Qodirqulovning ilk daqiqalardan maydonga tushishi bo‘ldi. Lekin bu qaror qanchalik to‘g‘ri ekanligini shu kuni barcha ko‘rdi...

Uchrashuv tezkor gol bilan boshlandi. Jamshid Iskanderov qanotga ochilayotgan Dostonbek Hamdamovga ajoyib tarzda pas berdi. Hamdamov jarima maydoniga oshirgan to‘pni. Yo‘q joydan paydo bo‘lgan Sanjar Qodirqulov bir urinishda burchakni nishonga olib, hisobni ochdi.

Darvoza ishg‘ol etilgach, vakillarimiz biroz tashabbusni raqibga bergandek bo‘lishdi. Biroq yamanliklarning oldinga o‘tishga jur’atlari etmadi.

Keyingi daqiqalarda Qodirqulov va Hamdamovning urinishlaridan naf chiqmadi. O‘yinning uchdan bir qisi ortda qolganda, Rossiya chempionatida porlayotgan Eldor Shomurodov “Rostov” safida bosh bilan gol urgandek, Yaman darvozasini ishg‘ol etdi. Shomurodovga Farruh Sayfiev assistentlik vazifasini bajardi.

Natijada, jamoamiz tanaffusga 2:0 hisobidagi g‘alaba bilan chiqib ketdi.

Ikkinchi taymni ham hamyurtlarimiz faol boshlashdi. Ketma-ket urinishlar 53-daqiqada samara berdi. Sanjar Qodirqulovning pasidan keyin Iskanderov jarima maydoni tashqarisidan burama zarbasi orqali raqib posbonini ojiz qoldirdi. Ajoyib ijro!

Oradan ko‘p vaqt o‘tmay Eldor Shomurodov chap qanotdan reyd tashkil etdi. Hujumchimiz himoyachilarni tanasi orqali chalg‘itib, to‘pni sherigi Dostonbek Hamdamovga juda ham qulay tarzda oshirdi. Hamdamov jarima maydoni ichidan gol ura olmadi. O‘z navbatida Salim Avad ham vaziyatni to‘g‘ri baholab, xavfni bartaraf etgani e’tiborga molik.

66-daqiqada antiqa holat kuzatildi. Ya’ni hakamlar Odil Ahmedovning golini inobatga olishmadi. Bu vaziyatda to‘p bosh hakamga tekkani uchun referi golni bekor qildi. Qiziq, nega unda bosh hakam o‘ziga tekkan to‘pdan keyin hujum bo‘layotgan tomonga qarab yugurdi va darvoza ishg‘ol etilgach maydon markazini ko‘rsatdi? Aftidan qoida bosh hakamning yodidan ko‘tarilib qolgan ko‘rinadi. Chunki unga buni yordamchilari aytishdi.

Birinchi taymda bosh bilan bergan zarbarilari zoe ketgan Islom To‘xtaxo‘jaev 72-daqiqada niyatiga etdi. Jaloliddin Masharipov burchakdan uzatgan to‘pni himoyachimiz bu safar to‘rga yo‘llashda adashmadi.

Uchrashuv taqdiri hal etilgach Vadim Abramov umidli hujumchimiz Eldor Shomurodovni keyingi turlarga asrash uchun uni Igor Sergeev bilan almashtirdi.

Sergeev maydonga tushgach dastlabki imkoniyatlaridan foydalana olmadi. Ammo bellashuvning oxirgi daqiqasida hujumchimiz muvaffaqiyat qozondi. Bu holatda Igor qanotdagi sherigi Hamdamovning sayi harakatlari evaziga bo‘sh darvozaga gol urdi. Ya’ni Dostonbek markazdan uzatilgan to‘pni to‘xtatmasdan qulay vaziyatda turgan Sergeevga uzatib berdi.

Shu tariqa, terma jamoamiz ishonchli g‘alabani tantana qildi.

Vadim Abramov tarkib tanlashda, o‘yinchi almashtirishda, to‘g‘ri taktika va futbolchilarga ko‘rsatma berishda o‘z salohiyatini namoyish etdi. Ushbu g‘alaba avvalgi natijalarimiz sabab o‘zbek futbolidan ko‘ngli to‘lmayotgan muxlislarni yana stadionlarga qaytarishi turgan gap. Vadim Abramov o‘zbek futboli qanday o‘ynalishini, qanday uslubga to‘g‘ri kelishini ko‘rsatib berdi.