Бугун 10 нафар боксчимиз финал йўлланмасини қўлга киритди!

Осиё чемпионатида ўсмир ўғил болалар ўртасида бугун ярим финаллар старт олди.

Дастлабки баҳсда -46 кг да юртимиз шарафини ҳимоя қилаётган Абдуллоҳ Нуралиев  ҳиндистонлик Нелла Кумарга қарши рингга кўтарилди. Кескин курашларга бой ўтган жангда Нуралиев 5:0 ҳисобида ғалаба қозониб, финалга йўл олди!

48 кг: Бу вазн тоифасида Камронбек Баҳодиров ярим финалда иорданиялик Салте Алҳадади билан тўқнаш келди. Жанг иккинчи раундда Баҳодировнинг техник нокаутли ғалабаси билан якунланди. 

-52 кг: Ойбек Алимджонов Иштирокидаги ярим финал баҳси ҳам якунланди. У эронлик Аболфазл Малекка қарши рингга кўтарилди. Бутун жанг мобайнида устунлик қилган вакилимиз, якунда 5:0 ҳисобида зафар қучди.

-54 кг: Абдулбосит Юрсинбоев ярим финал жангида ҳиндистонлик Пал Нивешга қарши рингга кўтарилди. 
Жуда қизиқарли кечган тўқнашувда вакилимиз 5:0 ҳисобида ғалаба қозонди ва финал йўлланмасини йўлга киритди. 

-60 кг: Аҳмадхон Абдусатторов иштирокидаги ярим финал баҳси якунланди. Қирғизистонлик Эрбол Баратохуновга қарши рингга кўтарилган вакилимиз, ишончли ҳаракатлари билан 4:1 ҳисобида зафар қучди ва финалга йўл олди!

-63 кг: Рушен Сайдуллаев ярим финалда мўғулистонлик Баттамуулен Батболдга қарши рингга кўтарилди.
Жангда жуда катта устунликка эришган Сайдуллаев 3 раундда келиб, техник нокаут билан ғалаба қозонди. 

-66 кг: Баҳодир Холиқулов ва туркманистонлик Юнус Машарипов ўртасидаги ярим финал жанги ниҳоясига етди. Барча раунд давомида вакилимиз рақибдан бир бош устун эканини намойиш қилиб, якунда 5:0 ҳисобида ғалаба қозонди ва финал йўлланмасини қўлга киритди!

-70 кг да юртимиз шарафини ҳимоя қилаётган Абдувоҳид Абдумажидов финал йўлида ҳиндистон Наман Кумар билан ўзаро баҳс олиб борди. 1 раундда 3:2 ҳисобида ғалаба қозонган вакилимиз, 2 раундда худди шу ҳисобда имкониятни бой бериб қўйди. Ҳал қилувчи раундга келиб, Абдумажидов ҳақиқий ирода кўрсатди ва якунда 3:2 ҳисобида зафар қучиб, финалга йўл олди.

-75 кг: Маруфжон Тошпулатов ва қирғизистонлик Нуртилек Жоробаев жанги муддатдан аввал якунланди. Вакилимиз 2 раундга қадар уч бор ҳисобни очишга муваффақ бўлди. Шундан сўнг ҳакам жангни тўхтатди ва ғалаба Тошпулатовга берилди!  Бизда яна бир финалчи!

Ваниҳоят ҳамюртларимиз иштирокидаги ярим финаллар якунланди! -80 кг вазнда Самандарбек Умаров Қирғизистон вакили Амирхан Курманбековга қарши рингга кўтарилди. Умаров 2 раундда ҳисобни очди. 3 раундда эса рақибни техник нокаутга учратиб, финал йўлланмасини нақд қилди!