Бугун финал! Кубок водийда қолади, аммо...

Бугун финал, бугун нафақат йил, балки тарихий учрашув. Ўз тарихида биринчи марта финалга йўл олган “Андижон” илк уринишидаёқ Кубокни Андижонга олиб кетадими ёки “Навбаҳор” тўртинчи Кубогини қўлга киритадими?

Анчадан бери Кубок финалида водий дербисига гувоҳ бўлмагандик. Бу сафарги учрашув бошқача ўтиши кутилмоқда. Чиндан ҳам ўйинга қизиқиш ниҳоятда катта. Айниқса, иккала жамоа мухлислари ҳам алоҳида тайёрланишган ва “Истиқлол” стадионида қандай атмосфера яратилишини биргаликда кўришимиз мумкин. Бу оддий ўйин эмас. Унда кимдир албатта ғолиб чиқиши шарт. Нима бўлганда ҳам Кубок водийда қолади, аммо қаерда? Андижондами ёки Намангандами?!

Қизиғи, бу клублар жорий йилги Кубок учун курашни бир гуруҳда бошлашди ва якунда иккиси ҳал қилувчи босқичгача етиб келдилар. Бу йўлда жамоалар қийин рақибларни ортда қолдирдилар. Айниқса, “Андижон” Кубокнинг амалдаги соҳиби “Насаф”ни курашдан чиқариб юборди. Бу йил 60 йиллий юбилейида “Бургутлар”нинг Кубок финалига йўл олгани ҳам бежиз эмас.

Хабарингиз бор, мамлакатимизнинг энг совриндор клублари қаторидан жой олган ва Суперлига (олий лига)мизнинг мунтазам иштирокчиси бўлган “Навбаҳор” биллур совринни 3 марта – 1992, 1995 ҳамда 1998 йилларда қўлга киритган, 1993 ва 2022 йилларда финал иштирокчисига айланиб, ҳал қилувчи баҳсларда “Пахтакор” (0:3, 1993 йили) ҳамда “Насаф” (1:2, 2022 йил) жамоаларига имкониятни бой берган.

“Андижон” эса ўз тарихида илк марта Ўзбекистон Кубоги финалига етиб келди.

“Навбаҳор” ва “Андижон” жамоалари  Ўзбекистон Кубоги доирасидаги баҳсларда ўзаро 8 марта рўбарў келишган.

Ушбу ўйинларнинг 6 тасида “Навбаҳор” ғалаба қозонган бўлса,  2 та баҳсда андижонликлар зафар қучишган. Тўплар нисбатидаги устунлик ҳам “Навбаҳор” тарафида – 15 - 7.

Қизиғи, мазкур жамоалар жорий мавсумда Ўзбекистон Кубогининг гуруҳ босқичида ҳам ўзаро беллашишган, Наманганда бўлиб ўтган баҳсда наманганликлар Тома Табатадзе (20-пен.) ва Йован Жокич (60)ларнинг голларига эвазига 2:1 ҳисобида ғалаба қозонишганди.

Андижонликларнинг ягона голига эса Армин Бошняк (88) муаллифлик қилганди.        

Ушбу жамоаларнинг Ўзбекистон Кубоги доирасидаги барча учрашувлари натижалари:

1992 йил. 1/4 финал

“Наврўз” – “Навбаҳор” – 0:1

“Навбаҳор” – “Наврўз” – 3:1

1993 йил. 1/4 финал

“Навбаҳор” – “Наврўз” – 4:2

“Наврўз” – “Навбаҳор” – 1:0

2002/2003 йиллар. Гуруҳ босқичи

“Андижон” – “Навбаҳор” – 1:4

2018 йил. 1/16 финал

“Андижон” – “Навбаҳор” – 1:0

2023 йил. Гуруҳ босқичи

“Навбаҳор” – “Андижон” – 1:0

2024 йил. Гуруҳ босқичи

“Навбаҳор” – “Андижон” – 2:1.

Эслатиб ўтамиз, “Навбаҳор” – “Андижон” учрашуви 5 октябрь куни Фарғонадаги “Истиқлол” стадионида соат 17:00 да старт олади.