Бугун Ўзбекистон терма жамоаси Осиё кубоги финалчилари билан ўйнайди

Айни вақтда Қатарнинг Доҳа шаҳрида ўқув-йиғин машғулотларини давом эттираётган Ўзбекистон миллий терма жамоаси назорат учрашуви доирасида Иордания билан куч синашади. 

Иордания терма жамоаси 2024 йилда бўлиб ўтган Осиё кубоги финалчилари ҳисобланади. Улар турнирнинг ярим финалида Жанубий Кореяни 2:0 ҳисобида таслим этишга муваффақ бўлган. Финалда эса Қатарга 1:3 ҳисобида имкониятни бой берган. 



Рақибларимиз "ЖЧ-2026" саралаши доирасида "B" гуруҳдан жой олган. Улар айни вақтда тўққиз очко билан 3-поғонани банд этиб турибди. 

Иордания жой олган "B" гуруҳидаги вазият: 

1. Жанубий Корея: 14 очко;
2. Ироқ: 11 очко;
3. Иордания: 9 очко;
4. Уммон: 6 очко;
5. Қувайт: 4 очко;
6. Фаластин: 3 очко. 



Биласиз, Ўзбекистон терма жамоаси ҳал қилувчи саралаш босқичи доирасида "А" гуруҳидан жой олган ва 13 очко билан ўз гуруҳида Эрондан кейинги 2-поғонани банд этиб турибди. 

Ўзбекистон жой олган "А" гуруҳидаги вазият

1. Эрон: 16 очко;
2. Ўзбекистон: 13 очко; 
3. БАА: 10 очко; 
4. Қатар: 7 очко;
5. Қирғизистон: 3 очко;
6. КХДР: 2 очко. 



Таъкидлаш керак, Иордания терма жамоаси айни вақтда FIFA рейтингида 64-ўринни банд этиб турибди. Ўзбекистон эса улардан 6 поғона юқорида, яъни 58-поғонада бормоқда. Иордания терма жамоаси таркибининг умумий трансфер қиймати 14 миллион еврони ташкил қилса, Ўзбекистонда мазкур кўрсаткич уч баравардан ҳам кўпроқ. Аниқроғи, 47 миллион евро (мазкур қиймат терма жамоаларнинг сўнгги расмий FIFA кунларига келган кенгайтирилган таркибидан келиб чиқиб белгиланган, ҳозирги таркиблардаги қиймат аслида билан эмас). 

Мазкур ўйин биз учун назорат баҳси бўлишига қарамай, анча аҳамиятли саналади. Сабаби, бу сафар йиғинга чақирилганлар таркибда кўп ҳам имконият берилмайдиган футболчилар ва янги номлардан иборат. Қўшимчасига, термамиз мураббийлик постида ҳам ўзгариш бўлган. Ёшларимизни Олимпиадага олиб чиққан кучли тактик мураббий Темур Кападзе қўл остида миллий терма жамоамизни кўриш ҳам қизиқ бўлади. 

Маълумот учун, бугунги Ўзбекистон - Иордания баҳси Тошкент вақти билан 22:00да старт олади. Ўйин Доҳадаги "Абдуллоҳ Бин Ҳалифа" стадионида ўтказилади. Беллашувни ЖОНЛИ ЭФИРда ЎФАнинг "You Tube" саҳифаси орқали томоша қилишингиз мумкин.