"Бунёдкор"нинг Анталиядаги илк рақиби маълум

Эртадан Туркиянинг Анталия шаҳрида қишки ўқув-машғулот йиғинини бошлайдиган “Бунёдкор”нинг назорат учрашувлари доирасидаги дастлабки рақиби маълум.

Клуб матбуот хизматининг ёзишича, Илёс Зейтуллаев мураббийлигидаги жамоа 14 январь куни Чехия чемпионатининг 2-лигаси пешқадами “Зброёвка Брно”га қарши майдонга тушади. Даража жиҳатидан Ўзбекистон Про лигасига тенг келадиган Чехия 2-лигасида 1-давра ўйинлари якунига етган. Рақиб 16 та жамоа қатнашадиган лиганинг биринчи даврасида 13 та ўйинда ғалаба қозонган бўлса, 2 та учрашувда дуранг қайд этган, биргина баҳсда мағлубиятга учраб, 41 очко билан яққол пешқадам бўлиб турибди. 

Чехиялик 51 ёшли мутахассис Мартин Сведик мураббийлик қиладиган “Зброёвка Брно” сафида асосан маҳаллий футболчилар тўп суради. Таркибдаги ўйинчиларнинг ўртача ёши 26.9 ни ташкил қилади. Жамоанинг трансфермаркт порталидаги умумий баҳоси – 5.96 миллион евро.