Бускетс "Барса"га мураббий бўлади

«Барселона» собиқ ярим ҳимоячиси Серхио Бускетс клубнинг иккинчи жамоаси мураббийлар штабига қўшилиши мумкин. Sport.es нашрининг ёзишича, у жамоага бош мураббий Жулиано Беллетти ёрдамчиси сифатида таклиф этилмоқда.

Манбага кўра, каталонияликлар Бускетсни ишга жалб этиш ғоясига ижобий қарайди. Эътиборлиси, у ҳали мураббийлик лицензиясига эга эмас. Шунга қарамасдан, клуб раҳбарияти унинг тажрибаси ва «Барселона» услубини яхши билишини муҳим омил сифатида кўрмоқда. Ўтган мавсумда «Барселона Б» Испаниянинг тўртинчи поғонадаги дивизионида олтинчи ўринни эгаллаган эди.

Серхио Бускетс «Барселона» таркибида 15 мавсум ҳаракат қилиб, сине-гранатаворлар билан клуб тарихидаги энг муваффақиятли футболчилардан бирига айланди. Кейинчалик у «Интер Майами» билан шартнома имзолаб, шу ерда профессионал карьерасини якунлади. Клуб даражасида Бускетс жами 840 ўйин ўтказган, 19 гол урган ва 62 голли пас берган.

У клублар билан биргаликда 35та соврин қўлга киритган: Ла Лигада тўққиз марта, Испания Кубоги ва Испания Суперкубогида етти мартатан ғолиб чиққан. Шунингдек, УЕФА Чемпионлар Лигаси, УЕФА Суперкубоги ва Жаҳон клублар чемпионатида уч мартатан зафар қучган. Бир мартадан МЛСнинг мунтазам чемпионати, Шимолий Америка лигаси Кубоги ва МЛС Кубогида ҳам ғолибликни қўлга киритган.

Испания терма жамоаси сафида Бускетс 143 ўйин ўтказган (2 гол ва 9 голли пас) ҳамда терма билан бирга 2010 йилги Жаҳон чемпионати ва 2012 йилги Европа чемпионатида чемпионликни қўлга киритган.