“Челси” муҳим трансферни якунлади

Англия Премьер-лигасидаги мавқеини мустаҳкамлашган интилаётган “Челси” клуби раҳбарияти Франциянинг “Страсбур” жамоасидан ярим ҳимоячи Валентин Барко билан шартнома имзолаганини расман эълон қилди.

21 ёшли Барко 2033 йилгача мўлжалланган шартнома тузди ва таътили якунланганидан кейин Хаби Алонсо бошқараётган жамоа йиғинига қўшилади.

Барко фаолиятини Аргентинанинг “Бока Хуниорс” клубида бошлаган. У 2024 йилда “Брайтон”га ўтган бўлса-да, Премьер-лигада атиги олтита учрашувда майдонга тушган.

У кейинчалик бир ярим мавсум давомида “Страсбур” шарафини ҳимоя қилди ва жами 58 та ўйинда иштирок этди. Шундан 43 таси ўтган мавсумга тўғри келади.

“Страсбур”даги муваффақиятли ўйини эвазига Барко Аргентина терма жамоасининг Жаҳон чемпионати учун қайдномасига киритилди ва гуруҳ босқичида Иорданияга қарши баҳсда захирадан майдонга тушди.

Барко бу ёзда Хаби Алонсо жамоасига қўшилган Данни Уэлбек, Морган Рожерс, Максанс Лакруа ва Марко Палестрадан кейинги навбатдаги янги футболчига айланди.

У ярим ҳимоядан ташқари чап қанот ҳимоясида ҳам ҳаракат қила олади. Бу эса Марк Кукурелья кетганидан кейин “Челси” учун айниқса муҳим аҳамият касб этмоқда.