«Chelsi» yarimhimoyachining jamoadan ketishini e’lon qildi

«Chelsi» klubi hujumkor yarim himoyachisi Omari Kelliman Fransiyaning «Strasburg» jamoasiga o‘tdi. Bu haqida London klubi matbuot xizmati rasmiy ma’lum qildi.

«Biz Omariga karyerasining yangi bosqichida omad va katta yutuqlar tilaymiz», — deyiladi «Chelsi» bayonotida.

Sport jurnalisti Grem Beylining ma’lum qilishicha, 20 yoshli futbolchiga Angliya Chempionshipida ishtirok etuvchi bir qator klublar qiziqish bildirgan. Shunga qaramay, Kelliman o‘z faoliyatini Fransiyada davom ettirishni ma’qul ko‘rgan. Shu bilan birga, «Chelsi» futbolchini keyinchalik qayta sotib olish huquqini saqlab qolgani qayd etilmoqda.

Omari Kelliman 2024 yili «Aston Villa» tarkibidan «Chelsi»ga 22,5 million yevro evaziga o‘tgan edi. U asosiy jamoa safida maydonga tushishga ulgurmadi, yoshlar jamoasida esa bor-yo‘g‘i besh o‘yin o‘tkazib, ikki bor gol urdi.