Чемпион жамоадан бир кунда учта ҳимоячи кетди

Италиянинг амалдаги чемпиони “Интер” клуби расмий сайти орқали жамоанинг ҳимоя чизиғида тўп сурган бир нечта футболчи клубни тарк этганини маълум қилди.

Жамоадан италиялик Маттео Дармиан ва Франческо Ачерби, шунингдек нидерландиялик ҳимоячи Стефан де Врей кетди. Учала футболчининг миланликлар билан амалдаги шартномаси тугаб, эркин агент мақомига эга бўлди.

Аввалроқ “Интер” швейцариялик дарвозабон Янн Зоммер билан ҳам хайрлашганини эълон қилган эди.

Ўтган мавсум якунларига кўра, Милан гранди энг яқин таъқибчисидан 11 очко олдинда бўлиб, А Серия чемпионига айланди. Шунингдек, «нерадзуррилар» Италия кубогини ҳам қўлга киритди.