Чемпионликка бир қадам қолди

Нидерландиянинг Вей-анг-Зеб шаҳри мезбонлик қилаётган “Tata Steel Chess 2026” турнирининг 12-тур баҳслари ўз якунига етди. 

Мазкур тур доирасида Нодирбек Абдусатторов германиялик Матиес Блуэбаумга қарши оқ доналардан зафар қучиб, очколари сонини 8 тага етказиб олди. Мусобақанинг тугашида атига бир тур қолганида ҳамюртимизнинг якка пешқадамлик қилаётгани ўзбекистонлик кўплаб шахмат ихлосмандларини хурсанд қилмоқда. 

Нодирбек ўйиндан кейин берган қисқа интервьюсида ўзининг 2023 ҳамда 2024 йиллардаги ушбу мусобақадаги иштирокларини эслаб ўтди. Шунингдек, у ҳозирги вазиятидан жуда ҳам мамнунлигини ва финал ўйинида ҳам ғалаба учун ҳаракат қилишини таъкидлаб ўтди. 

Эртага бўлиб ўтадиган баҳс Абдусатторов учун принципиал аҳамиятга эга. Сабаби, ўтган йили ҳиндистонлик Аржун Эригаиси шахматчимизни мағлубиятга учратганди. Нодирбек интервьюсида реванш кайфияти борлигини ҳам яширмади. 

Яна бир ҳамюртимиз Жавоҳир Синдаров бу турда Рамешбабу Прагнанадҳага қарши оқ доналардан дуранг қайд этиб, мустаҳкам иккинчи ўринга ўрнашиб олди. Агар 13-турда ҳам филиппинлик Таи Даи Ван Нгуенга қарши ғалаба қозонишни уддалай олса, ўзи учун энг камида иккинчи ўринни нақд қилиб қўйиши мумкин. 

1 февраль соат 18:15'да бошланадиган финал 13-тур баҳсларида ҳар икки шахматчимизга омад тилаймиз ва қўллаб қувватлаймиз.