Диёр Имомхўжаев: Футбол шарҳлашни жуда хоҳлаганман, аммо...

SPORTS.uz сайти ПФЛ раҳбари Диёр Имомхўжаев билан эксклюзив интервью ташкил этди. Ушбу суҳбат давомида мухлислар ўзларини қизиқтирган саволларга жавоб олишга муваффақ бўлди.

- Нима учун футбол шарҳловчилигига қўл урдингиз?

- Тўғриси, бу менинг орзуларимдан бири эди. Спорт каналида ишлаб юрган пайтларим, шарҳ хонасига киришни жуда хоҳлаганман. Негадир менга футбол шарҳлашга имкон беришларини сўрашдан тортинганман. Aйниқса, 2014 йилдаги жаҳон чемпионати ўйинлари шарҳида иштирок этгим келган. Тўғриси, "Спорт" каналидаги айримлардан яхши шарҳлай олишимга ишончим комил эди. Менга ЖЧ ҳақидаги лавҳалар тайёрлаш вазифасини юклатишди. "Хўп", деб ҳаммасини бажарганман. Ҳамма топшириқларни ортиғи билан бажарганман, аммо менга ҳам шарҳлашга имкон беришларини сўрай олмаганман. Кейинчалик, бир-иккита ўйинларни беришди. Тўғриси, уни шарҳ, деб ҳисобламайман. Сабаби, Бундеслиганинг энг зерикарли баҳсларидан қониқмаганман. Боз устига, ўйинлар ёзиб олингач, эфирга узатилар, ўйин ҳисобини билар эдим. Кейинроқ, Даврон Файзиев "Футбол ТВ"га ўтди. Бу орада мен "Спорт" каналидан ишдан кетгач, "эркин агент" мақомида "Футбол ТВ" билан шартнома имзоладим. Биринчи шарҳим Даврон акам билан бўлди. Уёғига ўша ерда ишлаб қолдим. Ҳозир ҳам жуда кўп мухлисларимиз нега шарҳламай қўйганим ҳақида сўрамоқда. Тўғриси, бунга умуман вақтим бўлмаяпти. 6 ойдан бери тиғиз тақвимда ишлаганим учун шарҳ хонасига кира олмаяпман. Тўғриси, Европа футболидан анча чиқиб қолдим. Aгар 2-3 ой яхшилаб тайёргарлик кўрсам, яна шарҳга қайтишим мумкин. Бор эътиборим ўзимизнинг футболга қаратилган. Ўз вазифамни тўлиқ бажармай туриб, бошқа ишга киришим адолатдан эмас. Ҳозир орамизда 2-3 та ишда ишлаб, бирортасини эплай олмаётганлар етарлича.

- Ўзбекистон терма жамоаси ЖЧга чиқа олмаса ҳайрон қоласизми?

- Йўқ! Мен олдин ҳам ҳайрон бўлмаганман. Мени ўзимни энг катта умидим 2026 йилдан. Ҳозирги ҳаракатларим эвазига пайдо бўлган "силкиниш" сабабли олдинга қадам ташлашимиз мумкин. Режаларимизни амалга оширгач, натижа кутишга ҳақлимиз. "Умидлар интихода ўлади", деган гап бор. Балки сен билан 3 йилдан сўнг кўришсак, 2030 йилдан умид қилиб ўтирган бўлишим ҳам ҳеч гап эмас. Ҳозирги ҳолатда, нимадир дейишга ҳам ҳайронман. Мен ҳам мухлислар сингари ЖЧ йўлланмасига эга бўлишимизни орзу қиламан. ПФЛ директори сифатида ўз позициям бор. Биринчи навбатда, ҳар ҳафтада бўладиган ички чемпионатимизни юқори даражага олиб чиқишимиз керак. Aна шунда, биз ҳам Aнглия чемпионати сингари ҳар ҳафтада 90 дақиқалик даҳшатли тўқнашув кўрамиз. ЖЧга чиқиш учун биз бир неча йиллардан бери ўзбек футболини ривожланишини секинлаштиряпмиз. Мундиалга чиққач, узоғи билан 3 та жамоа билан тўп сурамиз. Кейинчи? Ўзимизнинг чемпионатдан ҳам томошабоп ўйинлар бўлиши керак. Биз ички биринчиликдаги тўқнашувларни ҳам шундай орзиқиб кутишимиз лозим. Aна шунда, футболимизда ривожланиш кўзга ташланади.