ЕЧЛ. Қайси клубларда плей-оффга чиқиш имконияти бор?

Чемпионлар лигаси 5-туридан ўрин олган барча учрашувлар ўз ниҳоясига етди. Ажойиб голлар ва воқеаларга бой ўтган турдан сўнг плей-оффга йўл олганларнинг сони ҳам ортди. Аммо барчаси сўнгги турда ҳал бўладиган гуруҳлар йўқ эмас. Шунингдек, Европа лигаси учун ҳам кураш авжида. Айни пайтда 12 та жамоа 1/16 босқичида, 4 жой қолди. Ўз ўринларини банд қилиш учун қайси клублар ҳаракат қилмоқда?

"A" гуруҳи

5-турда "Бавария" "Копенгаген" меҳмони бўлиб кутилмаганда очко йўқотди. Бироз зерикарли ўтган ўйинда мезбонлар дарвоза дахлсизлигини сақлаб қолди ва иккинчи ўринга чиқиб олди. "Манчестер Юнайтед" ва "Галатасарой" ўртасида бўлиб ўтган ўйин эса тарихга кирди. Дастлаб, Гарначо ва Фернандешнинг супер голи орқали "қизил иблислар" 2:0 ҳисобида олдинга чиқиб олди. Биринчи тайм сўнггида эса Зиеш ажойиб голи билан жавоб қайтарди. Мактоминей орадаги фарқни иккитага ошириб қўйган бўлса, 62-дақиқада Онана қўпол хатога йўл қўйди ва Зиеш дулблни расмийлаштирди. Шундан сўнг Актюркоглу жамоасини қутқариб қолувчи голни урди. Ушбу турдан кейин плей-офф учун ҳақиқий кураш бошланди. "Копенгаген" ва "Галатасарой"да 5, МЮда эса 4 очко мавжуд. 6-турда инглизлар "Бавария"ни ўз майдонида қабул қилади. Тен Хаг шогирдлари немисларни ютган тақдирда ҳам нариги баҳсда дуранг натижа қайд этилиши керак. Агар кимдир ғалаба қозонса, "Манчестер Юнайтед" Европа лигасига йўл олади. Агарда мағлубиятга учраса, турнирни тарк этади. 

"B" гуруҳи

"Арсенал" 5-турга келиб "очилиб кетди". "Ланс" дарвозаси 6 марта ишғол қилинган учрашувда Ҳусанов захирадан майдонга тушди. Шу билан биргаликда, битта сариқ карточка олди ва пенальтига ҳам сабабчи бўлиб қолди. "Канонирлар" гуруҳдан чиқиб бўлганди. Энди биринчи ўрин билан плей-оффга йўл оладиган бўлди. "Севилья" - ПСВ баҳсида эса супер камбэк гувоҳига айландик. Дастлаб, Рамос ва Эн-Несириларнинг голлари эвазига хотиржам нафас олишни бошлаган мезбонлар якунда 2:3 ҳисобида мағлуб бўлиб, 4-ўринда қолиб кетди. Аммо испанларда ҳали Европа лигасига чиқиш имкони бор. Сўнгги турда клуб "Ланс"га қарши ўйнайди. 

"C" гуруҳи

"Брага" ўз майдонида "Унион Берлин" билан дуранг ўйнаб, ЧЛда қолиш имкониятини сақлаб қолди. Немислар ғалаба қозонганида "Наполи" плей-офф масаласини ҳал қилган бўларди. Неаполликлар эса "Реал"га таслим бўлди. 9-дақиқа Симьоне ҳисобни очган бўлса, орадан кўп ўтмай мезбонлар иккита гол билан жавоб қайтарди. Иккинчи тайм бошида Ангисса имкониятларни тенглаштирди, лекин Пас ва Хоселулар жамоасига 3 очко тақдим этувчи голларни урди. Гуруҳда "Реал" 15 очко билан биринчи, "Наполи" 7 очко тўплаган ҳолда иккинчи поғонада бормоқда. "Брага"да эса 4 очко бор. "Унион Берлин" сўнгги турда мадридликларни таслим қилса, Европа лигаси учун курашиб кўрса бўлади. 

"D" гуруҳи

"Интер" ПСВдан қолишмайдиган камбэкни амалга оширишга муваффақ бўлди. Мариу ярим соат ичида хет-трик қилиб, ҳисобни йириклаштирганди. Миланликлар эса иккинчи таймда 3 та гол билан жавоб қайтара олди. "Реал Сосьедад" ҳам "Цальсбург" билан дуранг ўйнади. Шу билан "Интер" ва испанларнинг очколари сони 11 тага етди. Сўнгги турда улар ўзаро тўқнаш келади ва биринчи ўринни ҳал қилиб олишади. "Бенфика" эса Европа лигаси учун "Цальзбург" билан кураш олиб боради. 

"E" гуруҳи

"Лацио" ўз майдонида "Селтик"ни Иммобиленинг дубли эвазига мағлуб қилди. Шу тариқа, Сарри шогирдлари плей-офф масаласини ҳал қилди. "Атлетико" эса сафарда "Фейеноорд" устидан зафар қучди. Қизиқарли томони ўйиндаги 3 та голни мезбонларнинг ўзи урди. Иккита автогол ва Эрмосонинг бир марта дарвозани ишғол қилиши "матрасчилар"га ғалаба тақдим этди. "Лацио"да биринчи ўринни қўлга киритиш имкони ҳам бор, бунинг учун "Атлетико" тўсиғидан ўтиши керак бўлади. "Фейеноорд" бўлса Европа лигасига йўл оладиган бўлди. 

"F" гуруҳи

"Ўлим" гуруҳида ҳаммаси сўнгги турда ҳал бўладиган бўлди. Фақатгина "Боруссия" муддатидан олдин гуруҳдан чиқа олди. Клуб 5-турда "Милан"ни меҳмонда мағлуб қилди ва 3 очкони қўлга киритди. ПСЖ ўз майдонида "Ньюкасл"га ютқазиб қўйишига сал қолди. 24-дақиқада Исак ҳисобни очган бўлса, 90+8 дақиқада Мбаппе пенальтидан имкониятларни тенглаштиришга муваффақ бўлди. "XG"га кўра, парижликлар бу учрашувда камида 4 та гол уриши керак эди. Вазиятларидан фойдалана олмаган Энрике шогирдларини 6-турда "Боруссия" билан бўлиб ўтадиган баҳс кутмоқда. Агарда ўша тўқнашувда ПСЖ ғолиб бўлса, плей-оффга йўл олади. Дуранг ҳам клубни Европа лигаси сари етаклаши мумкин. "Милан" ва "Ньюкасл" ўртасида эса ҳақиқий жанг бўлиб ўтади. 

"G" гуруҳи

"Манчестер Сити" ва "Лейпциг" аллақачон гуруҳдан чиқишга муваффақ бўлган. Агарда немислар ғалабани ушлаб қола олганида биринчи ўрин билан плей-оффга йўл олиш учун кичик бўлсада имкони бўларди, лекин "шаҳарликлар" камбэк қилиб, 15 очко билан яққол пешқадамга айланди. Қолган жамоалар, яъни "Янг Бойз" ва "Црвена Звезда" 3-ўрин учун курашади. 

"H" гуруҳи

"Барселона" ўз майдонида муҳим ғалабани қўлга киритди. Дастлаб португалларнинг ҳисобни очиши бироз саросимани юзага келтирган бўлиши мумкин, лекин Канселунинг супер ҳаракатлари эвазига Хави катта танқидлардан қутулиб қолди. Энг муҳими икки йилдан кейин жамоа яна 1/16 босқичига чиқа олди. "Порту" эса сўнгги турда "Шахтёр" билан ўйнайди. Дуранг ҳам клубни гуруҳдан чиқишига ёрдам бера олади. "Ройал Антверпен" ҳали очко тўплай олгани йўқ. 6-турда белгияликлар мухлислар учун майдонга чиқади.