Элдор ўйинга тайёр!

ФИФА кунлари якунланиб, ўз мамлакатлари терма жамоалари шарафини ҳимоя қилган футболчилар клубларига қайтиб келди. Энди улар бор эътиборини миллий чемпионат ўйинларига қаратади.

Элдор Шомуродов ўйнаётган А Серияси ҳам қисқа танаффусдан кейин яна қизғин беллашувларга қайтди. ФИФА кунлари натижасида юзага келган танаффус Элдорнинг фойдасига ишлаганини алоҳида таъкидлаш лозим. Чунки, октябрь ойининг охиридаги машғулотлардан бирида сонидан шикастланган ўзбек футболчиси бу вақтни жароҳатини даволаш ва спорт формасини тиклаб олишга сарфлади.

Ўз навбатида, асосий футбол ташкилоти тақдим этган кунларда Ўзбекистон миллий терма жамоаси ҳам йиғин ўтказди. Вадим Абрамов энг машҳур легионерларимиз – Элдор Шомуродов ва Остон Ўруновни бу галги ўртоқлик ўйинларига жалб қилмади. Сабаби оддий, ҳар икки футболчи жароҳатини даволаётган эди. Бундан ташқари, Элдор ҳам, Остон ҳам янги клубга мослашиш жараёнини бошидан ўтказаётгани учун уларни безовта қилмасликка қарор қилинди.

Европадаги яна бир тўпурар легионеримиз Жасур Яхшибоевнинг биринчи йиғин доирасида Эрон терма жамоасига қарши учрашувдаги ўйини Вадим Абрамовга маъқул келмагани боис, Беларусь чемпионатининг энг яхши футболчисига ҳам чақирув юборилмади.

Шомуродов масаласига қайтсак. Элдор жароҳатидан буткул фориғ бўлган. “Женоа” расмий сайти бир ҳафта муқаддам эълон қилган хабарида  ўзбекистонлик легионер индивидуал машқлар дастурларини якунлаб, умумий гуруҳ машғулотларига қўшилгани ва бу жамоа ҳужум чизиғида имкониятларни оширишга хизмат қилишини алоҳида таъкидлаган эди.

Шунингдек, генуяликлар расмий сайти “Женоа” мураббийлар штаби бош мураббий Роландо Маранга турли даражадаги жароҳатларидан қутилган ҳужумчи Элдор Шомуродов, ҳимоячи Кристиан Сапата ва ярим ҳимоячи Стефано Стураро жисмоний ва руҳий томондан бўлажак ўйинга тайёр эканини маълум қилгани ҳақида ахборот чиқарди.

Таъкидлаш жоизки, юқорида номи келтирилган футболчилар генуяликлар сафига қайтгани билан жамоада кадрлар масаласи ҳамон долзарблигича қолмоқда.  Роландо Маран жамоасида асосий таркибнинг яна олти нафар ўйинчиси “ўйиндан ташқари” ҳолатда. Марко Пьяца, Франческо Кассата, Давиде Дзаппакоста, Доменико Кришито каби футболчилар ҳали ҳам лазаретда қолмоқда. Лассе Шёне ва Иван Лакисевич дисквалификация муддатини ўтаяпти.

22 ноябрь куни сафарда “Удинезе”га қарши бўладиган учрашувда “Женоа” ҳужумида илк дақиқалардан Горан Пандев тўп суриши кутилмоқда. Шимолий Македония терма жамоасида ҳам юқори спорт формасида эканини кўрсата олган бу “қария” генуяликларнинг А Серияда барча учрашувларда қатнашган икки футболчисидан бири ҳисобланади.

Катта эҳтимол билан, ҳужумда Пандевга кейинги ўйинларда тўпурарлик маҳоратини намойиш этаётган Итлия ёшлар терма жамоаси форварди Жанлука Скамакка ёрдам беради. Марко Пьяцанинг жароҳат олганини инобатга олиб, Элдор Шомуродов ва Маттиа Дестрода ҳам Удинедаги ўйинда майдонга тушиш имконияти бор. Бош мураббий кутилмаган қарорга келиб, Элдорга ҳам илк дақиқалардан ўзини кўрсатиш учун имкон беришига кичик бўлса-да, умид бор. Чунки генуяликлар ҳамюртимизни захирада олиб ўтириш учун трансфер қилмаган. Шомуродов харажатларни оқлаши учун уни кўпроқ  ўйнатиш лозим.  

Бундан ташқари, Шомуродов “Женоа” таркибида ўйин ўтказиб улгурган ҳужумчилар орасида  голлари ҳисобини очмаган ягона форвард бўлиб турибди. Бироқ, ўзбек футболчиси тўлиқ бўлмаган иккита ўйин ўтказганини ҳам ҳисобга олиш керак.

Элдорнинг ўзи эса ўйинга тайёр!

“Удинезе” – “Женоа” баҳси 22 ноябрь куни Тошкент вақти билан соат 22:00да бошланади.