Етти карра чемпион ўзига янги жамоа танлади

Германия миллий терма жамоаси ярим ҳимоячиси Леон Горецканинг келгуси фаолияти АҚШда давом этиши мумкин. 

Журналист ва инсайдер Том Богертнинг ёзишича, футболчи МЛС лигасида иштирок этувчи "Чикаго Файр" клуби билан музокара олиб бормоқда.

Горецка яқинда Мюнхеннинг "Бавария" клубини тарк этди. Агар келишув амалга ошса, у Иллинойс штати жамоаси сафида "Барселона"нинг собиқ ҳужумчиси Роберт Левандовски билан бир клубда тўп суриши мумкин. Шу билан бирга, бир қатор европалик клублар ҳам футболчининг келажагига қизиқиш билдирмоқда.

31 ёшли Леон Горецка 2018 йилдан бери "Бавария" шарафини ҳимоя қилиб келаётган эди. У мюнхенликлар таркибида етти марта Германия чемпиони (2018/2019, 2019/2020, 2020/2021, 2021/2022, 2022/2023, 2024/2025, 2025/2026), уч марта Германия кубоги соҳиби (2018/2019, 2019/2020, 2025/2026) ва тўрт марта мамлакат Суперкубоги ғолиби (2018, 2020, 2021, 2025) бўлди. 

Шунингдек, Горецка "Бавария" билан бирга Чемпионлар лигаси (2019/2020), УЕФА Суперкубоги (2020) ва клублар ўртасидаги жаҳон чемпионатида (2020) ғалаба қозонган.