«Эвертон» клубини сотиш бўйича жараён бошланди
“Эвертон” клуби амалдаги эгаси томонидан сотувга қўйилди, янги харидор изланмоқда.
Англиянинг машҳур футбол жамоаларидан бири бўлган "Эвертон" клуби сотувга қўйилди. Бу ҳақда клуб матбуот хизмати маълумот берди. Клубнинг амалдаги эгаси The Friedkin Group (TFG) янги харидор излаётганини расман тасдиқлади.
Компания баёнотида таъкидланишича, TFG "Эвертон"ни бошқарувга олган пайтда клуб жиддий молиявий ноаниқлик ва қийинчиликлар билан юзма-юз бўлган.
"TFG "Эвертон"ни қабул қилиб олганида, клуб майдонда ҳам, майдондан ташқарида ҳам жиддий муаммоларга дуч келган эди, - дейилади компания баёнотида. - Биринчи навбатдаги вазифа клуб келажагини таъминлаш учун зарур барқарорлик, сармоя ва қўллаб-қувватлашни йўлга қўйишдан иборат бўлди. Шу жумладан, содиқ мухлисларимизга анча вақтдан бери ваъда қилинаётган янги стадион қурилишини якунлашга кўмаклашиш муҳим эди. Ҳозир бу пойдевор ишончли тарзда яратилган бир пайтда, "Эвертон" ривожланишининг кейинги босқичи ҳақида ўйлаш учун қулай фурсат келди. Биз таклифларни фақат клубни олға бошлаб, эришилган ютуқларни ривожлантира олади, деб ишонган томонлардангина кўриб чиқамиз".
The Friedkin Group "Эвертон" клубини 2024 йилда сотиб олган эди. Ўтган мавсумда жамоа Англия чемпионатида 13-ўринни эгаллади. Жорий мавсумда эса "Эвертон" беш турдан сўнг 9 очко жамғарган ҳолда турнир жадвалида еттинчи поғонада бормоқда.
Изоҳлар (0)