"Евро-2024". Чорак финал баҳслари олдидан превью

Германия яшил майдонларида бўлиб ўтаётган Европа чемпионати турнирининг энг қизғин дамларига ҳам етиб келдик. Гуруҳ босқичида ўз квартетларида етакчи биринчи ва иккинчи ўринни эгаллаган 12 жамоа ҳамда энг яхши натижани қўлга киритган 4 та учинчи ўринни эгаллаган терма мусобақанинг 1/8 финал босқичида ўзаро куч синашди. Гуруҳида етакчи бўлиб нимчорак финалга келган олти терманинг (Германия, Испания, Англия, Португалия, Руминия ва Австрия) тўрттаси ўз мавқеларига хос ўйин кўрсатишди. Афсуски, Австрия ва Руминия жамоалари учун турнир нимчорак финалда якунланди. 

Турнир олдидан фаворитлар қаторида кўрилган, мусобақа собиқ чемпионлари Италия ҳамда ФИФА рейтингида учинчи поғонага мос кўрилган Бельгия жамоалари ҳам мусобақада кутилган даражада фаоллик кўрсата олишмади.

Нимчорак финал баҳсларида жонбозлик кўрсатиб, кейинги босқич йўлланмасини нақд қилган жамоаларнинг (Швейцария, Англия, Германия, Испания, Франция, Португалия, Нидерландия, Туркия ) кўпчилиги турнир давомида ёрқин ўйин кўрсатиб келмоқда. Масалан, ўйин давомида собиқ чемпионларга умуман имкон қолдирмаган Швейцария; Франция ҳамда Нидерландия каби терма жамоалар бор гуруҳда биринчиликни эгаллаган Австрия устидан ишончли ғалабани қўлга киритган Туркия. Ушбу жамоалардан кейинги босқичларда ҳам юқори даражадаги ўйин кўрсак ажаб эмас.

Ёрқин лаҳзаларга бой ўтиши кутилаётган чорак финал баҳслари эртага старт олади. Ўйинларнинг дастлабки кунида финал даражасига тенглаша оладиган икки учрашув гувоҳи бўламиз. Ушбу босқични очиб берувчи Испания - Германия баҳси Ўзбекистон вақти билан соат 21:00да старт олади. Икки жамоа ҳам икки хил турдаги жамоа. Бири авлодлар алмашинуви давридан ўтиб, эски тактикадан воз кечиб замонавий ҳамда позицион ўйин кўрсатаётган таркиб бўлса, иккинчиси тажрибага суянган холда жамоавий ва тактик, муҳими доим олдинга интилувчи жамоа. Қайғули томони шундаки, улардан бири турнирни шу босқичда тарк этади.  

Шу билан бирга куннинг якунида Португалия ва Франция тўқнашуви гувоҳи бўламиз. Тезкор ўйинга қарши жамоавий ўйин қарама-қаршилиги. иккиси хам эртанги учрашувда ўзгача ўйин кўрсатиши аниқ. Сабаби, Франция ҳали бирон марта ҳам ўйиндаги вазиятдан гол ура олмай автоголлар ва пенальтидан киритилган гол ҳисобига шу ергача етиб келди. Португалия эса Словения билан ўйиндан сўнг ўзини ўнглаб олган ҳолда, бошқа бундай хатоларга йўл қўймасликка ҳаракат қилади деган умиддамиз.

Айтиб ўтиш жоизки, эртага Европа чемпионати тарихида қоладиган унутилмас баҳслар бўлиб ўтади. Шундай экан, катта эҳтимол билан 2024 йилнинг энг эсда қоларли жараёни дея эътироф этилиши кутилаётган тўқнашувларда жамоаларга омад тилаб қоламиз.

Шу ўринда турли жабҳаларда ҳозиргача энг яхши кўрсаткич қайд этиб келаётган футболчилар билан танишамиз:

Энг яхши ҳимоячилар рўйхати:

Энг кўп сейв амалга оширган дарвозабонлар рўйхати:

Энг кўп дриблинг амалга оширган футболчилар рўйхати:

Тўпурарлар рўйхати:

Юқорида қайд этилган рўйхатлар Европа чемпионати расмий саҳифаларидан олинган.

                                                                                                                                                       Жаҳонгир Иномжонов