Файзуллаев Францияга борадими?
Франциянинг энг машҳур клубларидан “Монако”нинг Ўзбекистон миллий терма жамоаси ва ЦСКА клуби ҳужумкор футболчиси Аббосбек Файзуллаевни 15 миллион еврога трансфер қилиши ҳақидаги хабар футбол жамоатчилиги томонидан қизғин муҳокама қилинмоқда.
Sports.uz портали Россия футболининг энг таниқли экспертлари Файзуллаевнинг “Монако”га трансфери ҳақида билдираётган муносабатларини ўзбекистонлик футбол ишқибозлари эътиборига ҳавола этишда давом этади.
Александр Мостовой, Россия терма жамоаси ва “Сельта” клуби собиқ футболчиси:
Агар Аббосбек Файзуллаевга “Монако”дан шундай таклиф тушадиган бўлса, ўйлаб ўтирмай кетиши керак.
ЦСКАнинг ўзи ҳам бунча маблағ эвазига уни қўйиб юбориши аниқ. Бугунги шароитда 15 миллион евро – катта пул. Намуна учун узоққа бормайлик, “Монако”да ўйнаётган Александр Головин яққол мисол.
Агар бу трансфер амалга ошса, Файзуллаев учун топ-лигага йўл очилади.
Валерий Газзаев, Россия терма жамоаси собиқ бош мураббийи:
Файзуллаев 21 ёш, ЦСКАда эндигина иккинчи мавсумини ўтказмоқда. Бироқ бу футболчи бугунги кунда Осиё қитъасининг энг ёрқин талантларидан бири сифатида эътироф ва эътибор қозонган.
Биз ҳам унинг техник маҳоратини кузатиб боряпмиз ва у маҳорат бобида ЦСКАнинг қолган ўйинчилари орасида яққол ажралиб турибди.
Аббоснинг кетиши клуб учун катта йўқотиш бўлади ва ҳужум чизиғи қудрати заифлашиб қолади. Агар бу таклиф жиддий тарзда ўйинчини ва клубни қониқтирса, кейинчалик ўсиш учун ҳам уни қабул қилиш лозим.
Бу Файзуллавга топ-чемпионатда ўз маҳоратини кўрсатиши учун жуда яхши имконият бўлиши мумкин.
Юрий Сёмин, Россия терма жамоаси собиқ бош мураббийи:
“Монако” ҳал қилувчи расмий таклифни юборса, бу трансфер Аббосбек Файзуллаевнинг ўзига ҳам қизиқ бўлиши аниқ. Чунки бу бошқа даражадаги, бошқа савиядаги лига ва жамоада ўйнаш имкониятини беради.
Тўғрисини айтсам, трансфер расмий таклиф билдирилмагунча, трансферга ишониб қолиш керак эмас.
Аббосбек Файзуллаев 2023 йилнинг августида “Пахтакор”дан ЦСКАга кўчиб ўтган эди. Унинг “армиячилар” билан шартномаси 2026 йилнинг ёзигача давом этади. Ҳозирга қадар 21 ёшли легионеримиз ЦСКА таркибида барча мусобақаларда 54 та учрашувда майдонга тушиб, саккизта гол ва 20 та ассист муаллифи бўлган.
Ҳамюртимиз трансферларга ихтисослашган transfermarkt.world портали томонидан 6 миллион еврога баҳоланмоқда ва бу кўрсаткич бўйича Марказий Осиёнинг энг қимматбаҳо футболчиси ҳисобланади.
Фикрлар
Ҳамюртимиз трансферларга ихтисослашган transfermarkt.world портали томонидан 6 миллион еврога баҳоланмоқда ва бу кўрсаткич бўйича Марказий Осиёнинг энг қимматбаҳо футболчиси ҳисобланади"
. Шу абзац, Аббос ҳақидаги ҳар - бир хабар ва мақолада айнан такрорланади. Шу керакми?!
Бу нашрнинг, Аббос ҳақида ёзмаган куни йўқ бўлса, бир хил нарса такрорланаверса, муштарийларнинг жонига тегмайдими?! Муҳаррир ҳам ўқиб кўрадими, ўзи?