Файзуллаев қишда ЦСКАдан кетадими?

Ўзбекистон терма жамоаси ва ЦСКА аъзоси Аббосбек Файзуллаев қишки трансфер ойнасида "армиячилар" жамоасини тарк этмайди. Бу ҳақда 20 ёшли футболчи билан ҳамкорлик қилувчи "ProSports" раҳбарияти хабар берди.

"Биз қишда Файзуллаев бўйича таклифларни кўриб чиқмаймиз. Аббос билан буни муҳокама қилдик. Бу қачон бўлиши ҳақида клуб билан умумий ички тушунчага эгамиз", - деди агент Қахор Мўминов "Sport-Ekspress" нашрига берган интервьюсида.

Жорий мавсумда Файзуллаев москваликлар сафида 18 та ўйинда майдонга тушиб, иккита гол урди ва 9та голли узатмани амалга оширди. Унинг трансфер нархи 4 миллион еврога баҳоланмоқда.