Файзуллаев яна термада...

Футбол таҳлилига ихтисослашган whoscored.com сайти эксперлари Россия Премьер-лигасида ноябрь ойи якунларига кўра,  энг яхши футболчилардан таркиб топган рамзий терма жамоани тузиб чиқди.

Бу галги рамзий жамоага энг кўп вакили Москванинг “Спартак” клубидан киритилди. Дарвозага ушбу жамоа посбони Александр Максименко жойлаштирилди.

Шунингдек, “спартакчилар”дан ярим ҳимоячи Антон Зиньковский ва ҳужумчи Квинси Промес ҳам мутахассислар эътиборидан четда қолмади.

Пойтахтнинг яна бир вакили – “Днамо”нинг икки ўйинчиси ойнинг энг яхши футболчилари қаторида эътироф этилди. Ҳужумкор футболчи Бителло ва форвард Константин Тюкавин энг кучлилар қаторида.

Ҳимоя чизиғи “Оренбург”, “Рубин”, “Ростов” ва “Зенит” футболчилари – Арсен Адамов, Руслан Безруков, Максим Осипенко ҳамда Родригаога топширилди.

ЦСКАнинг энг яхши ўйинчиси Аббосбек Файзуллаев ва “Крилья Советов” легионери Бенхамин Гаррега ҳужумчилар ортидан жой ажратилган.

Рамзий терма жамоа қуйидагича кўриниш ҳосил қилди.

Ноябрь ойида ЦСКА Россия Премьер-лигасида учта учрашувда майдонга тушиб, биттадан ғалаба, дуранг ва мағлубият қайд этди.  Бу ўйинларда битта гол ва иккита ассистга муаллифлик қилди. Яна бир вазиятда рақиб Аббоснинг зарбасидан сўнг ўз дарвозасини ишғол қилиб қўйди. Умумий ҳисобда, Файзуллаев жамоасининг ўтган ойдаги олтита голидан тўрттасида ҳали қилувчи зарба ёки пас муаллифи бўлди.

Қолаверса, Аббос Россия кубоги доирасида ноябрь ойида “Оренбург” ва “Ростов” жамоаларига қарши ўтказилган учрашувларда иккита голли пас узатди ва битта пенальти ишлаб, жами учта голга ҳисса қўшди.

Эслатиб ўтамиз, Аббосбек Файзуллаев август ойида “Пахтакор”дан ЦСКАга кўчиб ўтган эди. Легионер сифатида илк бор хорижда ўйнаётган ҳужумкор футболчимиз жами 16 маротаба майдонга тушиб, иккита гол ва саккизта ассист расмийлаштирди.

20 ёшли ҳамюртимиз ЦСКАнинг сентябрь ва октябрь ойларидаги энг яхши футболчи сифатида эътироф этилди.

Бундан ташқари, Файзуллаев Премьер-лига ва мамлакат кубогида “Крилья Советов”, “Сартак”, “Рубин” ва “Ростов”га қарши ўтказилган учрашувларнинг энг яхши ўйинчисига аталган совринни ҳам қўлга киритган.