“Фенербаҳче” топ клубдан осиёлик юлдузни қайтариб олмоқчи

Туркиянинг энг қудратли клубларидан ҳисобланган “Фенербаҳче” келаси мавсум олдидан ҳимоя чизиғини кучайтириш учун илк жиддий қадамни ташлади.

Клуб собиқ ҳимоячиси Ким Мин-Жэни “Бавария”дан ижарага қайтариш бўйича дастлабки музокараларни бошлаган.

Ёзги трансфер режалари доирасида “Фенербаҳче” ҳимоя чизиғини мустаҳкамлашни асосий вазифа сифатида кўрмоқда. Шу сабаб клуб яхши таниш бўлган Ким Мин-Жэга эътибор қаратди.

Маълумотларга кўра, футболчининг агенти Оливейра Рита Истанбулга келиб, клуб расмийси Эртан Торуноғуллари билан учрашган. Бу эса музокаралар аллақачон бошланганини кўрсатади.

Учрашув давомида Ким Мин-Жэ “Бавария”да етарли ўйин амалиётига эга бўлмаётгани айтилган. Шу боис у жамоани тарк этиш вариантини кўриб чиқмоқда.

Ҳозирча трансфер ижара асосида бўлиши кутилмоқда. 29 ёшли ҳимоячи “Фенербаҳче”га қайтишга қарши эмас. Бу орқали у яна формага кириб, мунтазам ўйнаш имкониятига эга бўлишни истамоқда.

Ким Мин-Жэ ушбу мавсумда барча турнирларда 31 та ўйинда қатнашиб, 1 гол ва 1 ассист қайд этди.

Кореялик футболчи 2021-2022 йиллар давомида “Фенербаҳче” сафида 40 та ўйинда майдонга тушиб, 1 гол урган ва мухлислар ёдида яхши таассурот қолдирган.