ФИФА Мессини ажойиб рекорддан маҳрум қилди

Аргентина футболининг жонли афсонаси Лионель Месси жаҳон чемпионатлари тарихидаги энг кўп голли узатмалар бўйича марҳум ҳамюртдоши Диего Марадонадан ўтиб кетди, деган таассурот уйғонган эди. 

Қаттиқ курашларга бой, принципиал ўтган Кабо-Вердега қарши ўйинда Аргентина 3:2 ҳисобида ғалаба қозонди, Месси эса қўшимча дақиқаларда голли узатма берганди.

Бироқ шундан сўнг ФИФА қарорни қайта кўриб чиқди ва Кристиан Ромеро урган голни рақиб футболчиси Динейнинг ўз дарвозасига киритган тўп сифатида расмийлаштирди. Натижада ушбу эпизод Мессининг ассисти сифатида қайд этилмай қолди.

Шу тариқа, Мессининг жаҳон чемпионатларидаги голли узатмалари сони саккизта бўлиб қолмоқда. Худди шунча кўрсаткич Диего Марадона ҳисобида ҳам бор. Яъни, ҳозирча икки аргентиналик юлдуз бу йўналишда рекордни биргаликда бўлишиб турибди.

1/8 финалда Аргентина Миср терма жамоасига қарши майдонга тушади. Агар Лео ушбу босқичда яна камида битта голли узатма амалга оширса, жаҳон чемпионатлари тарихида энг кўп ассист берган футболчи сифатида якка рекордчига айланади.