ФИФА мундиалда Эроннинг жойини ўзгартирди

Халқаро футбол федерацияси (ФИФА) Эрон миллий терма жамоасига 2026 йилги жаҳон чемпионати даврида машғулот базасини АҚШдан Мексикага кўчиришга рухсат берди.

Бу ҳақда Эрон футбол федерацияси президенти Меҳди Тож маълум қилди.

Аввалига Эрон миллий терма жамоасининг машғулотлар базаси АҚШнинг Аризона штатида жойлашиши белгиланган эди.

-  Яхшиямки, биз юборган сўровлар, ФИФА ҳамда жаҳон чемпионати расмийлари билан учрашувлардан кейин жамоа базасини АҚШдан Мексикага кўчириш ҳақидаги илтимосимиз маъқулланди.

Биз Мексиканинг Тихуана шаҳридаги лагерда жойлашамиз. У Тинч океани яқинида ва Мексика ҳамда АҚШ чегарасида жойлашган, - деди Меҳди Тож.

Эрон миллий терма жамоаси жаҳон чемпионатининг гуруҳ босқичида Янги Зеландия, Бельгия ва Миср футболчилари билан баҳс олиб боради. Эрон иштирокидаги гуруҳ ўйинларининг барчаси АҚШ ҳудудида ўтказилади.