ФИФА расман Аргентинанинг Месси бўйича қарорини блоклади

Халқаро футбол федерацияси (ФИФА) Аргентина футбол ассоциациясига Лионель Месси терма жамоадаги фаолиятини якунлагандан кейин миллий жамоанинг 10-рақамини абадий равишда муомаладан чиқаришга рухсат бермайди, дея хабар бермоқда Sports Illustrated нашри.

Мессининг Аргентина терма жамоасидаги фаолиятини тугатиш ҳақидаги тарихий баёноти мамлакатда катта муҳокамаларга сабаб бўлди. Кўплаб мухлислар ва мутахассислар 10-рақамни абадий равишда «музлатиб қўйиш», уни бошқа ҳеч бир футболчига берилмаслигини талаб қилмоқда.

Бироқ айрим айрим спорт турларидан фарқли ўлароқ, Аргентина терма жамоасининг 10-рақамини расман муомаладан чиқариш ва уни Буэнос-Айресдаги «Монументаль» стадиони томи остига илиб қўйиш имкони йўқ. 

Бунга асосий тўсиқ – ФИФА қоидалари.

Аргентина футбол ассоциацияси президенти Клаудио Тапиа ҳам аввалроқ Мессининг рақамини «пенсияга чиқариш» режалари борлигини очиқ айтган эди. «Месси профессионал фаолиятини якунлаганидан сўнг, Аргентина терма жамоасининг 10-рақами муомаладан чиқарилади», — деган эди Тапиа 2024 йилда.

Аммо бу ваъдани амалга ошириш учун унга ФИФАнинг анча йиллардан бери қўлланиб келинаётган регламентларини четлаб ўтишга тўғри келади. Халқаро федерация миллий терма жамоалардан расмий мусобақаларда футболчилар рақамларини кетма-кет тартибда қўллашни талаб қилади. Масалан, 2026 йилги жаҳон чемпионатида ҳар бир терма жамоа 26 нафар футболчи рўйхатдан ўтказиши мумкин эди ва шу боис фақат 1-рақамдан 26-рақамгача бўлган формаларга рухсат берилган.

ФИФАнинг рақамларга оид қатъий қоидалари фақат ташкилот ҳимояси остида ўтадиган расмий мусобақаларга тааллуқли. Назорат ва ўртоқлик учрашувларида эса вазият бошқача. Аргентина бундай ўйинларда истаса, 10-рақамни ҳеч бир футболчига бермасдан майдонга тушиши мумкин», — дея ёзади манба.

Аргентина терма жамоасининг афсонавий сардори 31 август куни халқаро фаолиятини расман якунлаганини эълон қилди. 21 йил давомида Месси терма жамоа сафида 207 ўйин ўтказиб, 125 гол урди ва мамлакат тарихи учун мутлақ рекордлар ўрнатди. У Аргентинани Қатардаги жаҳон чемпионатида (2022) олтин медалга олиб чиқди, икки бор Америка кубогини (2021, 2024), «Финалиссимо»ни (2022) ва Пекиндаги (2008) олимпия олтинини қўлга киритди. Шунингдек, у икки марта жаҳон чемпионатларининг энг яхши футболчиси деб топилган (2014, 2022).