Флик “Барса” юлдузини жазолади

Испаниянинг амалдаги чемпиони “Барселона” бош мураббийи Ханс-Дитер Флик немисларга хос аниқликни ёқтиради ва режани бузган ўйинчиларни аяб ўтирмайди.

Mundo Deportivo нашрининг ёзишича, германиялик мураббий бу гал “Манчестер Юнайтед”дан ижарага олинган машҳур ҳужумчи Маркус Рэшфордни жазолади.

Гап шундаки, англиялик ўйинчи эрталабки машғулотга кеч қолди. Шу боис, Флик уни Испания чемпионати доирасида “Хетафе”га қарши ўтказилган учрашувда бошланғич таркибга киритмади.

Маркус Рэшфорд танаффусдан кейин жамоадоши Рафиньянинг ўрнига захирадан майдонга туширилди. Учрашув Флик шогирдларининг 3:0 ҳисобидаги ғалабаси билан якунланди.