Флорентино Перес "Реал"нинг супертрансферини блоклади

Мадриднинг «Реал» клубида «Манчестер Сити» ва Испания терма жамоаси ярим ҳимоячиси Родрини сотиб олиш масаласида ихтилофлар юзага келди, деб хабар бермоқда Marca нашри. 

Манба маълумотига кўра, клуб раҳбариятининг бир қисми 30 ёшли футболчини жамоага олиб келиш тарафдори. Мадридликларнинг қизиқиши жаҳон чемпионатидан сўнг янада кучайган. Ушбу мусобақада Родри Испания терма жамоасига чемпионликни қўлга киритишда катта ҳисса қўшди ва турнирнинг энг яхши ўйинчиси деб топилди.

«Реал»да Родри жамоа марказида Тони Кроос ва Лука Модрич кетганидан кейин пайдо бўлган бўшлиқни тўлдириши мумкин, деб ҳисоблашмоқда. Клуб раҳбарлари унинг етакчилик фазилатлари, ўйин суръатини назорат қила олиши, ҳужум ва ҳимоя ўртасида мувозанатни сақлаш маҳоратини юқори баҳоламоқда.

Манба таъкидлашича, футболчининг ўзи ҳам Испанияга қайтиш ғоясига ижобий қарайди ва мадрид клуби шарафини ҳимоя қилишни истайди. Родрининг «Манчестер Сити» билан амалдаги шартномаси 2027 йил 30 июнгача мўлжалланган. Шу боис «Реал» трансфер бўйича мақбул сумма эвазига келишувга эришишни умид қилмоқда.

Бироқ битимни амалга оширишда асосий тўсиқ сифатида «Қироллик клуби» президенти Флорентино Перес тилга олинмоқда. Журналист Фабрицио Романо маълумотича, мадридликлар раҳбари ҳозирча Родрини сотиб олиш заруратига ишонмаяпти ва эҳтимолий трансферни шахсан тўсиб қўяётгани айтилмоқда.

«Реал» раҳбариятидаги бир неча нуфузли шахслар Переснинг фикрини ўзгартиришга уринишмоқда. Уларнинг фикрича, ярим ҳимоячининг жаҳон чемпионатидаги ўйини унинг жамоа талабларига тўлиқ жавоб беришини ва айнан шу позицияни кучайтириш зарурлигини исботлади.

Шу орада «Манчестер Сити» ўзининг энг муҳим ўйинчиларидан бирини сақлаб қолиш ниятида. Апрель ойида инглиз клуби Родрига яхшиланган шартлар билан янги шартнома таклиф этди, аммо испаниялик футболчи ҳозирча якуний жавобини бермаган.

Эслатиб ўтамиз, Родри 2019 йилдан буён «Манчестер Сити» сафида тўп сурмоқда. Унинг амалдаги шартномаси 2027 йил ёзида ниҳоясига етади. Шу боис яқинлашиб келаётган трансфер ойнаси ярим ҳимоячининг келажагини ҳал қилувчи омилга айланиши мумкин.