Формула-1 Майами ГП: 19 ёшли Антонелли ғолиб, Леклернинг хатоси қимматга тушди, "Макларен" яна курашга қайтди, Верстаппен "Кун пойгачиси"

“Мерседес” жамоаси пилоти Кими Антонелли Майами Гран-присини поул-позициядан бошлаб ғалаба қозонди. Ландо Норрис ва Оскар Пиастри “Макларен” жамоасига иккита подиум олиб келишди.

Старт жуда тартибсиз бошланди: Антонелли ва Верстаппен биринчи бурилишда ғилдираклари блокланиб қолди, Леклер эса одатдагидек яхши старт олиб, учинчи ўриндан олдинга чиқиб кетди. Верстаппен эса кураш пайтида ўз ўқи атрофида айланиб кетди ва тўққизинчи ўринга тушиб кетди. Норрис учинчи ўринга кўтарилди, Пиастри эса еттинчи ўриндан тўртинчига чиқди. Хэмилтон ҳам яхши старт олди, аммо у билан Колапинто ўртасида контакт юз берди, натижада британиялик еттинчи ўринда қолди, лекин тез орада аргентиналик пойгачидан ўтиб кетди.

Тўртинчи айланада Расселл Пиастрини ортда қолдириб, тўртинчи ўринга чиқди, Антонелли эса Леклерни ортда қолдириб етакчиликни қайтариб олди. Кейинги айланада улар яна жой алмашди ва курашга Норрис ҳам қўшилиб, италияликни ортда қолдирди.

Бешинчи айланишда хавфсизлик машинаси (Safety Car) трассага чиқди: Хаджар деворга урилиб пойгани тарк этди, Гасли эса Лаусон билан тўқнашувдан сўнг машинаси ҳавода ағдарилиб, ҳимоя тўсиғига илиниб қолди. Яхшиямки, ҳайдовчи жароҳат олмади. Верстаппен эса топ-10 ичида ягона пит-стопга кирган пойгачи бўлди. Тўрт карра жаҳон чемпиони пойга сўнгигача қаттиқ шиналарда курашди.

12-айланиш бошида Saferty Car чиқиб кетди. Рестартда Оскар Расселлни ортда қолдириб, тўртинчи ўринни қайтариб олди. Бир айланишдан сўнг Норрис Леклерни ортда қолдириб етакчига айланди ва унга қарши ҳужум қилиш имконини бермади. Британиялик тезда 1,5 сониялик фарқ яратди. Кейин Антонелли ҳам Леклерни ортда қолдирди ва ундан узоқлаша бошлади. Стюардлар Верстаппеннинг пит-лейндан чиқишда оқ чизиқни кесиб ўтганини текширишга олди, аммо қарор пойгадан кейин чиқарилиши айтилди.

19-айланишда ёмғир яқинлашаётгани ҳақида огоҳлантириш берилди. Бу пайтда Норрис Антонеллидан 3 сония олдинда эди, Леклер эса ундан деярли 4 сония ортда қолган эди. 21-айланишда Расселл ёмғир огоҳлантиришларига қарамай питга кириб, қаттиқ (Hard) шиналарни олди ва 12-ўринда қайтди. Кейинги айланишда Леклер ҳам шундай қилди ва британиялик ортида бўлиб қолди. Антонелли ҳам питга кириб, бешинчи ўринда қайтди, натижада Пиастри иккинчи ўринга чиқди. Верстаппен Хэмилтонни ортда қолдириб учинчи бўлди.

Кейинчалик тартиб яна ўзгарди: Норрис ҳам питга кириб, Антонеллининг андеркат усулини қилишига йўл қўймади. Шунга қарамай, италиялик совуқ шиналарда Верстаппенни ортда қолдирди. Кейин Пиастри ҳам питга кирди ва Верстаппен пешқадамга айланди, чунки у олдинроқ пит қилган эди. Аммо тез орада Антонелли ва ундан кейин Норрис ҳам уни ортда қолдирди. Норрис тезда Антонеллига яқинлашди. Шу пайтда Антонелли радиоси орқали узатмалар қутиси билан муаммо борлигини, кейинроқ эса орқа шиналар ейилаётганини айтди. Шунга қарамай, Норрис уни қувиб ўта олмади.

Финишга 10 айланиш қолганида Леклер Верстаппенни ортда қолдириб учинчи ўринга чиқди, аммо Верстаппен тезда ўрнини қайтариб олди. Кейин Леклер яна муваффақиятли ҳужум қилиб, олдинга ўтиб кетди. Шу пайтда етакчилар ундан 20 сонияга узоқлашган эди. Пиастри ҳам эскирган шиналарда кетаётган Верстаппенни осонлик билан ортда қолдириб, тўртинчи ўринга чиқди. Сўнгги айланишларда Расселл Верстаппенга, Пиастри эса Леклерга яқинлашди. Расселл Верстаппенга ҳужум қилиб, улар ўртасида контакт юз берди ва “Мерседес” машинасининг олд қанот қисми шикастланди. Верстаппен эса ўз позициясини сақлаб қолди.

57-охирги айланишда Пиастри Леклердан учинчи ўринни тортиб олди. Бир неча сониядан кейин Леклер жиддий хатога йўл қўйиб болидини айлантириб юборди ва тўсиққа енгил урилди. У позициясини сақлаб қолди, аммо машинаси шикастланди ва Расселл ҳамда Верстаппенга марра чизиғида икки ўринни бой берди.