ФР: Қаршида "Сурхон"га "нон" йўқми?

Суперлиганинг 5-тур баҳслари давом этади. Сергей Токов, узр, Арсланов бошчилигидаги "Сурхон" кеча "Насаф" майдонида меҳмон бўлиб, қуруқ қўл билан пойтахтга қайтадиган бўлди. Сиз учун "Марказий"да ўтган ўйинга оид қизиқарли фактларни йиғдик:

1. "Насаф" узоқ муддатлик танаффусдан кейин ўз уйида ўтган қаторасига 2 ўйинни ютди. Бунақаси сўнгги бор 2021 йилги мавсумда содир бўлган эди.

2. Бу "Сурхон"нинг сафар ўйинларидаги дастлабки мағлубияти ҳисобланади. Термизлик футболчилар охирги бор Яйпанда меҳмон бўлиб, "Турон" билан дурангга эришганди.

3. Шерзод Насруллаев 31 учрашувлик танаффусдан кейин яна Суперлигада тўп киритди. "Аждарлар" ҳимоячисининг сўнгги голи 2021 йилнинг октябрь ойида "Машъал" дарвозасига урилган эди.

4. "Сурхон" сўнгги 1 йилда "Насаф" дарвозасини 2 бор ишғол қилган 3-жамоага айланди (ОКМК ва "Олимпик"дан кейин).

5. "Насаф" Темур Тўхтасинов бошқарган ўйинларни 2019 йилдан бери ютқазмаяпти. Сўнгги бор шундай воқеа Қўқонда рўй берган эди.

6. "Насаф" XXI асрда "Сурхон"га ютқазгани йўқ. Термизликларнинг ўзаро ўйинлардаги ягона ғалабаси 1999 йилда қўлга киритилган (3:1).

7. Бу жамоалар Қаршида 13-бор тўқнаш келишди. Энг қизиғи, "Сурхон" бу ўйинларда биттаям очко ололгани йўқ.

Фахриддин Рўзиев тайёрлади