Франция - Португалия: Превью

Ўзаро ўйинлардаги ғалабалар сони, киритилган голлар нисбати ва яна кўплаб статистикалар ушбу қарама-қаршилик арафасида унутилади. Франция - Португалия беллашуви, даставвал, хаёлимизни ўша 2016 йилги финал баҳсига олиб кетади. Ўша куни Криштиану икки сабабдан йиғлаганди: бирида жароҳат олиб, майдонни тарк этаётиб, алам билан кўз ёш тўккан бўлса, кейинроқ ғалаба завқидан қувончи ичига сиғмай, йиғлаб юборган. Экстра-таймлар давом этаётган бир пайтда “Парк де Франц”даги камералар майдондаги воқеалардан ҳам кўра Сантушдан кўп жамоадошларига кўрсатма бераёётган Роналдуни кўрсатарди. У оқсоқ оёғи билан мураббий майдончасини гир айланар, устозидан бир нарсаларни талаб қилар, мана шундай муҳим баҳснинг энг муҳим палласини бир чеккада кузатаётганидан ич-этини ерди. Эдернинг голи эса шу қадар мўжизавий тарзда киритилдики, бақиравериб кучи қолмаганини Криштиану ана шундагина сезди…

Эслаб олдик, шундайми?! Бугун у яна таркибда бор ва Парижга у қадар ҳал қилувчи мақомда бўлмаган учрашувда иштирок этиш учун ташриф буюрмоқда. Аммо ўша кун аламидан ҳам у олдинга боради, ўша кун ўчини бугун олиш учун французлар ҳам борини беради.

Франция

Дешам шогирдлари иккала турни ҳам ғалаба билан якунлашга эришди. Кутилмаган бир алпозда Швецияга қарши қийинчиликка учраган французлар Хорватияга қарши ўйинда 2018 йилги мундиал финалини ёдга олди. Дешам ихтиёрида янада кучайиб бораётган авлод мавжуд. Аммо унинг тактик қарашларидаги ажойиботларни ҳам таъкидлаб ўтишимиз зарур. Керакли пайтда тежамкор ўйин билан ҳам рақибларини таслим этишга қодир бўлган услубни у жамоасига сингдириб қўйган. Лекин энди Дидье олдида яна янги вазифалар пайдо бўлмоқда. Терма жамоага бир қатор ёш футболчилар етишиб чиқмоқда ва катта авлод вакилларининг айримлари билан хайрлашиш пайти яқинлашмоқда. Фаранглар орасида янги авлод Зидани сифатида кўрилаётган Мбаппенинг атрофига кучли жамоани қуриб чиқиш унинг зиммасига юкланган. 

Португалияга қарши беллашувда ғалаба қозониш унинг жамоаси учун ғоят муҳим. Ўтган мавсум ушбу турнирга жиддий эътибор қаратмагани сабабли французлар гуруҳ босқичида қолиб кетди ва кейинчалик УЕФА турнир мавқейини оширишга қаратилган бир қатор ишларни амалга оширди. Шу сабабли, жорий мавсумда нафақат амалдаги жаҳон чемпионлари, балки “кўҳна қитъа”нинг бошқа грандлари ҳам мусобақага астойдил тайёргарлик кўришмоқда. Ахир, ўртага Қатардаги жаҳон чемпионати йўлланмалари тикилган. 

Тахминий таркиб: Льорис, Лангле, Эрнандес, Павар, Варан, Толиссо, Канте, Погба, Гризманн, Марсьяль, Мбаппе.

Дидье Дешам: “Бизнинг 25 та футболчимизнинг барчаси тайёр. ЕВРО финали? Бунга анча бўлди ва энди тарихни ўзгартира олмаймиз. Менда жамоам билан ғалаба қозонган мусобақаларимиз ҳақидаги кўплаб яхши хотиралар бор. Мағлубиятларимиз ҳам, ўз навбатида, хафа қилади. 4 йил ортга қайтган ҳолда уларни чемпионлик билан табриклайман. Аммо бу биз учун фойдали бўлди, сабаби кейин Жаҳон чемпионлигини қўлга киритдик. Биз навбатдаги баҳсда майдонга тушамиз, холос. Бу Европанинг иккита энг зўр жамоалари ўртасидаги ажойиб тўқнашув. Агар жаҳоннинг бўлмаса…”

Португалия

Сантуш шогирдлари эса ҳар иккала учрашувда ишонч билан ғалаба қозонишга эришди. Жамоа Роналду эраси якунланиб бораётганидан у қадар хавотирга тушаётгани йўқ. Чунки жамоада унинг ўрнини боса олувчи футболчи бўлмаса-да, истеъдодларга тўлиб-тошган авлод мавжуд. Хорватияга ҳеч қандай имкон бермаган ўйинда португаллар Роналдусиз ҳаракат қилганди. Келгуси ўйинда эса Роналду Швеция масаласини ҳал қилиб берди.

Кўпчилик Португалияда Сантушдан ҳам кўра Роналду кўпроқ жамоани бошқаради, деб ўйлайди. Аммо аслида ким бош мураббийлигини Фернанду доим исботлаб келади. Криштиану ўйнашни хоҳлаган баҳсга уни майдонга туширмаслик ва кейинги ўйинда захирага олиш учун мураббийнинг ўз овози бўлиши лозим. 

Бундан ташқари, португаллар 5 карра “Олтин тўп” соҳибисиз ҳам ғалаба қозонаётгани ҳам бежиз эмас. 

Тахминий таркиб: Патрисиу, Пепе, Геррейру, Канселу, Диаш, Невеш, Фернандеш, Моутиньо, Бернарду, Роналду, Фелиш.

Фернанду Сантуш: “Биз қийин рақибга қарши майдонга тушаётганимизни тўлақонли ҳис қилиб турибмиз. Аммо шуни ҳам унутмаслигимиз керакки, бизнинг ўзимизга яраша кучли жиҳатларимиз бор. Демак, ғалаба учун имкониятларимиз етарли. Бу амалга ошиши учун биз барча фронтларда ўзимизнинг энг яхши ўйинимизни намойиш эта олишимиз лозим. Португалияга осон бўлмаслиги аниқ, бироқ французлар ҳам қийинчиликларга учрайди”. 

Хулоса ўрнида

Дешам айтганидек, ЕВРО-2016 финалидан буён кўп нарсалар ўзгариб кетди. Миллатлар Лигаси ҳам курашиш учун сабаб бўла оладиган катта мусобақа ва барибир французларда қасос кайфияти ҳукмрон. Ўз навбатида, Роналду ўзини финал завқидан маҳрум қилганларни шахсан жазолашни орзу қилиши табиий. Принципиал рақиблар ўртасидаги катта баҳс бизни олдинда кутиб турибди. 

Бугунги таркиблар ва жамоаларнинг ҳолати нуқтайи назаридан, кимгадир устунлик беришни хоҳламаган бўлардим. Иккала жамоа ҳам исталган дақиқада ўйинни ўз томонига оғдириб олишга қодир бўлган куч ва салоҳиятга эга.

Абдулвосид Валихонов тайёрлади