Франция — Ироқ ўйини хавф остида

2026 йилги жаҳон чемпионати гуруҳ босқичининг 2-туридан ўрин олган Франция ва Ироқ терма жамоалари ўртасидаги учрашув хавф остида қолди. 23 июнь куни Филадельфия шаҳридаги «Линкольн Файненшел Филд» стадионида бўлиб ўтиши керак бўлган ўйин кучли ёмғир ва чақмоқ сабаб ўз вақтида ўтказилмаслиги мумкин. Бу ҳақда нашр L’Équipe хабар берди.

Синоптиклар маълумотига кўра, учрашув вақтида ҳаво ҳарорати +33 даражагача кўтарилиши кутилмоқда. Шу билан бирга, қисқа муддатли кучли ёмғир ва чақмоқ кузатилиши эҳтимоли юқори. Амалдаги хавфсизлик қоидаларига биноан, бундай шароитда ўйин вақтинча тўхтатилиши ёки кечиктирилиши мумкин.

Эслатиб ўтамиз, 2025 йил ёзида АҚШда ўтказилган клублар ўртасидаги жаҳон чемпионатида ҳам шунга ўхшаш ҳолат қайд этилган эди. «Челси» ва «Бенфика» жамоалари ўртасидаги 1/16 финал баҳси чақмоқ сабаб тахминан икки соатга тўхтатилган, натижада бутун ўйин умумий ҳисобда тўрт соат 38 дақиқага чўзилган.