"Freestyle Chess" Жаҳон чемпионати: Карлсен ва Каруана финалда!

"Freestyle Chess" бўйича жаҳон чемпионатида финалчилар номи аниқ бўлди. Ҳал қилувчи баҳсда Магнус Карлсен ва Фабиано Каруана ўзаро куч синашади.

Карлсен ярим финалда Нодирбек Абдусатторовни мағлуб этди. Дастлабки икки партия тенг ва кескин кураш остида ўтган бўлса, учинчи ва тўртинчи партияларда норвегиялик гроссмейстер устунлик қилди. Учинчи партияда Абдусатторов яхши позицияга эга эди, аммо бир юришлик хатодан сўнг мағлубиятга учради ва ҳисобни тенглаштира олмади. Карлсен учун бу Фишер шоҳмати бўйича расмий жаҳон чемпионатларидаги иккинчи финал — у 2019 йилдаги турнирда Уэсли Сога қарши ўйнаган эди.

Иккинчи ярим финалда Каруана амалдаги Вайсенхаус турнири ғолиби Винсент Кеймерни мағлуб этди. Бошқа баҳсларда Жавохир Синдаров Аржун Эригайсига ютқазди, Левон Аронян эса Ханс Ниманнга имкониятни бой берди.

Шу тариқа, бешинчи ўрин учун Эригайси ва Ниманн, еттинчи ўрин учун Синдаров ва Аронян баҳс олиб боради. Учинчи ўрин учун эса Абдусатторов ва Кеймер тўқнаш келади.