Гвардиола “Барса”дан янги юлдуз танлади

Хосеп Гвардиола ёзги трансферлар даврида жамоа таркибини кучайтира оладиган футболчиларни ҳозирдан танлаб қўйишга алоҳида эътибор қаратмоқда.

Испаниялик мутахассисни мавсум охирида “Манчестер Сити”ни тарк этишини эълон қилган Кевин де Брюйненинг ўрнини босадиган номзод ўйлантирмоқда.

El Nacional нашрининг ёзишича, Гвардиола майдон марказини кучайтирадиган футболчи сифатида “Барселона” юлдузи Дани Ольмони олиб келмоқчи. Манбанинг таъкидлашича, “шаҳарликлар” устози бу футболчи “Лейпциг”да ўйнаб юрган кезларидаёқ уни нишонга олиб қўйган экан.

Гвардиола испаниялик футболчи у қўллаётган ўйин услубига идеал даражада мос тушишига ишонмоқда. Қолаверса, “Барселона” ўтган ёзда Ольмони трансфер қилганидан бери уни Ла Лига қайдномасидан ўтказишда муаммоларга дуч келмоқда. Бу омил 26 ёшли футболчини олиш имкониятини оширади.

Ольмонинг каталонияликлар билан тузган шартномасида уни 60 миллион еврога трансфер қилиш имкониятини берувчи банд ҳам киритилган.