2019 йилнинг охирги ҳафтаси ҳам поёнига етиб қолди ва келаси ҳафтада янги йилни қарши оламиз. Чиндан ҳам бу жорий йилдаги сўнгги ҳафта бўлгани сабабли унда бир қатор футболимизга тааллуқли эътиборга молик воқеа ҳамда ҳодисалар ҳам юз берди. Бугунги мақоламизни эса айнан якунига етаётган ҳафтадаги амалга оширилган вазиятларга қаратмоқчимиз.

ЎФА ҳамда ПФЛ лауреатларни тақдирлади

24 декабрь куни Тошкентдаги «Зарафшон» залида Ўзбекистон футбол ассоциацияси ҳамда профессионал футбол лигаси 2019 йилга бағишланган тадбирни ташкил этди. Унда дастлаб йиллик ҳисобот тингланди ва сўнгра йил лауреатларини тақдирлаш маросими ўтказилди. Ушбу тадбирда эса бир қанча мураббий-ю, футболчилар ўзларига тегишли бўлган совринларни қабул қилиб олдилар. Айтиш жоизки, ўша куни футболимиз жамоатчилигининг барча эътибори ушбу тадбирга қаратилганди ва ЎФА ҳамда ПФЛ томонидан ташкил этилган маросим муваффақиятли тарзда ўтказилди.

лауреат

Анзур Исмоилов «Пахтакор»га қайтди

Ўзбекистоннинг амалдаги чемпиони «Пахтакор» янги мавсум учун дастлабки харидини амалга оширди. Бу кутилганидек, Анзур Исмоилов бўлди. «Локомотив» шарафини ҳимоя қилган тажрибали ўйинчининг охирги пайтларда «Пахтакор»га ўтиши борасида гап-сўзлар тарқалганди ва бу ҳолатнинг амалга ошиши ҳам кутилаётган ҳодиса эди. Натижада ҳаммаси ўз тасдиғини топди ва Исмоилов расман «Пахтакор» аъзосига айланди. Чиндан ҳам бу якунига етаётган ҳафтанинг эътиборга молик воқеаларидан бири бўлди десак муболаға қилмаган бўламиз.

исмоилов_1

Кахи Махарадзе билан Марат Бикмаевнинг «Локомотив»га қайтиши

Чемпионатни иккинчи ўринда якунлаган «Локомотив» ҳам таркибида ўзгаришларни бошлаб юборди. Хабарингиз бор, 11 декабрь куни клубга Андрей Фёдоров қайтарилган ҳолда у яна бош мураббийлик лавозимини эгаллади. Бунинг қарангки, шундан кейин «Локо» яна ўзининг собиқ аъзоларини қайтариш эпидемиясини давом эттирмоқда. Фёдоровдан сўнг грузиялик футболчи Кахи Махарадзенинг расман «Локо»га қайтгани эълон қилинди. Якунига етган мавсумни «Сўғдиёна»да ўтказган Кахи бунга қадар ҳам бир неча мавсум давомида «Локомотив» шарафини муносиб тарзда ҳимоя қилганини мухлислар ҳали унутишмаган бўлса керак. Бу хабар ҳали «совиб» улгурмасидан клуб яна бир собиқ футболчини ортга қайтарганини ошкор қилди. Йил бошида «Локомотив»дан «Пахтакор»га ўтиб кетган ҳужумчи Марат Бикмаев Кахидан сўнг темирйўлчиларга қайтгани маълум бўлди. «Пахтакор»да Черан билан Сергеевнинг «соя»сида қолиб кетган тажрибали Бикмаев балки яна «Локомотив»да ўзининг тўпурарлик салоҳиятини кўрсата олар. Ҳаммасини эса вақт кўрсатади.

Миржалол Қосимов АГМК билан шартномасини узайтирди

«Мавсум-2019»да Суперлигада 8-ўринни эгаллаб Ўзбекистон Кубоги билан Лига Кубогининг финалларигача етиб келган АГМКнинг иштироки турлича таассуротлар қолдирди. Жамоа бош мураббийи сифатида илк мавсумини ўтказган Миржалол Қосимовнинг яна АГМКда ишлашда давом этадими ёки йўқми, деган савол эса тобора кун тартибига чиқаётганди. Лекин куни кеча расмий хабар берилди ва унга кўра Миржалол Қўшоқович АГМК билан шартномасини узайтирди. Бу борада мураббийнинг ўзи фикр билдирар экан, АГМК билан ўртадаги битим узайтирилганидан мамнун эканлигини билдирди. Шу тариқа, Қосимов атрофидаги гап-сўзларга ўз-ўзидан барҳам берилди.

қосимов_1

«Машъал» клубининг 35 йиллиги нишонланди

Икки йиллик танаффусдан сўнг ниҳоят Муборакнинг «Машъал» клуби Суперлига йўлланмасини қўлга киритишга муваффақ бўлди. Бунинг устига бу жамоанинг ташкил этилганига 35 йил тўлганди. Шу муносабат билан Муборакда қўшалоқ байрам ташкил этилди. Клубнинг 35 йиллик юбилейи ҳамда Суперлига йўлланмаси қўлга киритилгани кенг нишонланди.

Элдор Шомуродов уйланди

28 декабрь «Ростов» клубининг ҳужумчиси, Ўзбекистон миллий терма жамоасининг ҳужумчиси Элдор Шомуродов учун ҳаётида унутилмас кун бўлиб қолди. Боиси, шу куни «Ростов» клубининг тўпурари бўлиб турган ҳамюртимиз оила қурди. Пойтахтимиздаги «Версал» тўйхонасида уюштирилган Элдор Шомуродовнинг никоҳ кечасига унинг яқинлари, футболимиз жамоатчилигида кўзга кўринган шахслар ва яна кўплаб меҳмонлар иштирок этишди. Шу фурсатдан фойдаланган ҳолда Элдор Шомуродовга оилавий бахт саодат тилаб қоламиз.

 

Фикрлар

Фикр қолдириш учун авторизациядан ўтинг!