Ҳамма кутаётган учта супертрансфер!

Европа футболида ёзги трансферлар якунига қадар учта катта трансфер амалга оширилиши мумкин. Sports.uz сайти кўплаб мухлису мутахассислар эътиборида турган ушбу трансферлар ҳақида маълумот беради.

Лоренцо Инсинье

Кутилаётган трансферлардан бири “Наполи” ҳужумчиси Лоренцо Инсиньенинг “Интер”га ўтишидир. Маълумотларга қараганда, бу ўйинчи неаполликлар билан шартномани узайтиришдан бош тортган ва клубни тарк этмоқчи.

Асосий ҳужумчиси Ромелу Лукакуни “Челси”га трансфер қилган “Интер” ўз сафига Инсиньени чорламоқда ва трансфер бўйича музокараларга тайёр.

 “Наполи” мутасаддилари Италия терма жамоаси ҳужумчисини ўз сафида ушлаб қола олмаслигини билган ҳолда, уни 30 миллион еврога қўйиб юборишга тайёр. Бу футболчи яқинда Италия терма жамоаси сафида Европа чемпиони бўлди.

 Инсиьо “Наполи” тарбияланувчиси ҳисобланади. Бу жамоа сафида 303 та учрашувда 84 та гол урган. Турли йилларда ижара асосида “Кавеза”, “Фоджа” ва”Пескара” жамоаларида тўп тепган.

2013 йилдан бери Италия терма жамоасига жалб этиб келинмоқда. У мамлакат бош жамоаси либосида 47 та учрашув ўтказиб, рақиблар дарвозасини 10 маротаба ишғол қилган.

Ҳарри Кейн

Яна бир эътибордаги масала Ҳарри Кейннинг “Манчестер Сити”га трансфери.

“Тоттенхэм” Англия чемпионлиги ва Европа чемпионлар лигаси бош соврини учун кураша олмайдиган жамоа. Лондонликлар узоғи билан Чемпионлар лигаси йўлланмасини кўзлаб, рақобатга киришиши мумкин. Лекин кўпинча бу ҳам армон бўлиб қолади.

Англиянинг бугунги кундаги энг кучли ҳужумчиси ҳисобланган Ҳарри Кейн кучга тўлган даврини юқори мақсадлар учун курашадиган қудратли жамоада ўтказмоқчи ва шу боис, “Тоттенхэм”ни тарк этмоқчилигини эълон қилган.

“Тоттенхэм” аввалига асосий тўпурарини 150 миллион евродан кам бўлмаган суммага қўйиб юборишга тайёрлигини билдирганди.

“Манчестер Сити” бу нархни кўтаришга ва ҳатто қўшимча бонуслар беришга тайёр эканини билдирганидан кейин Лондон клуби президенти Даниэл Леви ҳужумчини сотишдан бош торта бошлади.

Ҳарри Кейн клуб хўжайини гапида турмагани учун норозилигини машғулотларга бормаслик орқали намойиш қилди. Бироқ, профессионал спортчи шартномага амал қилиши керак. “Манчестер Сити” эса ўзи орзу қилган ҳужумчига эга бўлиш учун Даниэл Левига турли шаклдаги таклифларни йўлламоқда.

Килиан Мбаппе

“Реал” раҳбарияти Килиан Мбаппенинг келаси йили эркин агентга айланишини кутмасдан бу трансферни шу ёз ҳал қилмоқчи.

Мадридликлар бунинг учун 120 миллион евродан воз кечишга тайёр. Агар “Қироллик клуби” плеймейкер Мартин Эдегорни сотиб юборишни уддаласа, Килиан учун таклиф 150 миллион еврогача кўтарилади.

Мбаппенинг ўзи ҳам “Реал”га ўтмоқчи. Айниқса, ПСЖга Лионель Месси келганидан кейин ёш ҳужумчи аргентиналик юлдузнинг соясида қолиб кетиши мумкин.

Килиан ПСЖ унинг барча талабларини бажаришга тайёрлигига қарамасда, янги битимга имзо чеккани йўқ. Парижликлар Мбаппени ўз таркибида олиб қолишга ҳаракат қилаётган бўлса-да, қайсар ҳужумчи эркин агентга айланмай туриб, уни каттароқ суммага сотиб юборгани маъқул.