"Ҳумо" бош мураббийи карантинни қаерда ўтказмоқда?

Тошкентнинг "Ҳумо" хоккей клуби бош мураббийи Евгений Попихин коронавирус пандемияси вақтида карантинни қишлоқда ўтказаётганлигини айтиб ўтди.

"Подмосковьеда, қишлоқда яшаяпман. Қизим, турмуш ўртоғим, набираларим, қайнонам - барча шу ерда. Ўзимизни яккалаганмиз. Ҳозирги вазиятни жуда яхши тушиниб турибмиз ва бу борада барча талабларни бажармоқдамиз. Бироз кутиш ва яхши бўлишига умид қилиш керак.

Клуб шифокори, тиббиёт соҳасидаги яқинларим вазият жиддий эканлигини таъкидлашди. Қолаверса, набираларимнинг бири энди бир ёшда бўлса, иккинчиси 5 га тўлди. Шу боис, жиддий эътибор бердик. Бу борада бизда ҳарбий интизом мавжуд. Турмуш ўртоғим барчасини назорат қилади, қизим ҳам. Москвада бунга кўпчилик енгил қарамоқда, аммо рақамларга қарасак, бу жуда жиддий масала. Бу эпидемия жуда тез тарқалади ва ҳаёт учун хавфлидир. Афсуски, буни ҳамма ҳам тушунмаяпти", - деди Попихин.