Иан Гарри Ислом Махачевга нега ютқазди?

UFC собиқ чемпиони Ти Жей Диллашоу ирландиялик Иан Гаррининг чиқишини қаттиқ танқид қилди.

"Менингча, Иан ғалаба қозонишни эмас, тирик қолишни ўйлади. Унга фақат бир нарса муҳимдек туюлди — босим остида қолмаслик, ерга йиқилмаслик ва шармандали тарзда ютқазмаслик. У шунчаки жангни охиригача етказишни истади, холос. Аслида эса Гарри анча фаолроқ ҳужум қилиши керак эди. Зарба сонини кўпайтириши, Исламнинг елкалари орқасига чиқиб ҳаракатланиши, унинг олдида қотиб турмаслиги лозим эди. У бутунлай бошқача жанг қилиши мумкин эди", — деди Диллашоу.

Шунингдек, Ти Жейнинг фикрича, Гаррининг мағлубиятига асосий сабаб — руҳий тайёргарлик ва фикрлаш тарзи бўлган.

"Техника жиҳатдан Иан етарлича кучли. Лекин сенда "қотил инстинкти" бўлиши шарт. Октагонга чиққанда муносабат шундай бўлиши керак: "Сендан устунман. Мен йиқитилишдан ҳимояландим, қийин вазиятдан чиқиб кетдим, бунга жуда кўп куч сарфладим, энди эса сени бутунлай йўқ қиламан". Шу руҳда жанг қилиш керак, йиқитилишдан қутулиб олгач, орқага чекиниб, дам олиш эмас", — дея Диллашоунинг сўзларини келтирди "MMASucka" нашри.

Эслатиб ўтамиз, 15 август куни АҚШнинг Филадельфия шаҳрида бўлиб ўтган жангда Иан Гарри 49–46, 49–46, 48–47 ҳисобида Ислам Махачевга имкониятни бой бериб қўйди.