Ибрагимович ва Лукаку жазоланди

“Милан” ҳужумчиси Златан Ибрагимович ва “Интер” ҳужумчиси Ромелу Лукаку Италия кубоги 1/4 финал учрашувида содир этган хатти-ҳаракатлари учун жазоланди.

Football-Italia нашри тарқатган хабарга кўра, швециялик футболчи 4 минг евро, бельгиялик футболчи 3 минг евро жаримага тортилган.

Эслатиб ўтамиз, Златан ва Ромелу ўртасидаги зиддият биринчи бўлим охирида содир бўлган эди. Футболчилар бир-бирлари ҳақида кескин фикрлар билдиришди ва бунинг учун ҳакам уларни сариқ карточка билан жазолади.

Ибрагимович жорий мавсум А Серияда 15 та гол урди, Лукаку ҳисобида 21 та гол мавжуд.