Испания юлдузи учун мундиал тугади

Испания терма жамоаси ва «Кристал Пэлас» вингери Йереми Пино жаҳон чемпионатининг қолган қисмини ўтказиб юборади. Бу ҳақда BBC Sport хабар берди. 

Футболчи Уругвайга қарши ўйинда (1:0) ўмров суяги сингган, деган гумон бор. Пино майдонга 66-дақиқада гол муаллифи Алекс Баэнани алмаштириб тушди. 

Ўйин асосий вақти якунланиш арафасида у ноқулай равишда чап елкаси устига йиқилиб, оғриқ ҳис қилди ва шифокорларни чақиришга мажбур бўлди. Қаттиқ оғриқ аломатларига қарамай, испаниялик футболчи учрашувни охиригача давом эттирди, чунки ўша вақтга келиб Испания терма жамоаси барча алмаштириш ҳуқуқидан фойдаланиб бўлган эди.

Энди вингер тўлиқ тиббий кўрикдан ўтказилади. Агар унда суяк синиш жароҳати тасдиқланса, Пино жаҳон чемпионатида бошқа майдонга туша олмайди. 

Гуруҳ босқичини етти очко билан якунлаган Испания H гуруҳида биринчи ўринни эгаллаб, плей-оффга йўл олди. 1/16 финалдаги рақиби ҳозирча аниқ эмас.