Jamshid Tagiev: "Hali ko‘rasiz ular UFCni "yondirishadi!"

O‘zbekiston muaytay va kikboksing olamida Tagievlarning o‘z o‘rni bor, desak mubolag‘a bo‘lmaydi. Jumladan, Suxrob, Bobur va Jamshid Tagievlar juda ko‘p musobaqalarda yurtimiz sharafini munosib himoya qilishgan. Hozirga kelib, Suhrob Tagiev o‘z faoliyatini yakunlagan bo‘lsa, Bobur va Jamshid AQShda faoliyat yuritishmoqda. Bobur Tagievni MMA janglarida ishtirok etayotganiga guvoh bo‘ldik. Biroq, Jamshid Tagiev AQShga yo‘l olganidan buyon janglarda ishtirok etmadi. Biz bu nima bilan bog‘liq ekanligi va umuman AQShdagi faoliyati haqida bilish uchun sportchimiz bilan bog‘landik.
- AQShda ham mashg‘ulotlarimni davom ettirmoqdaman. Albatta, maqsadlarim bor. Nufuzli ligalarda jang qilish niyatidaman. Bilasiz, bu erda Nursulton Ro‘ziboev, Bobur Tagiev va Firdavs Hasanovlar bilan birgalikda shug‘ullanamiz va men ularga asosiy sparring sherik bo‘layapman. Qaysidir ma’noda murabbiylik ham qilaman. Albatta, akamiz Azamat Asadov bizni har tomonlama qo‘llab-quvvatlamoqda. Barcha sharoitlarni yaratib bergan. Oldimda hozircha ko‘p ligalarda jang qilish imkoniyati bor. Ko‘ramiz MMA yoki professional kikboksing yo‘nalishlarida tez orada o‘z jangimni o‘tkazaman. Bilasiz, hozirga kelib, promoushenlarda gonorar miqdori anchagina salmoqli ko‘rinish olgan. Men 1-jangimda 100 AQSh dollari olgandim. Xatto, bu erda sparring sherik bo‘lish ham pul turadi. Ko‘plab xorijliklardan sparring sheriklikka taklif bo‘lyapti. Biroq, hozircha Nursulton, Firdavs va Boburga ko‘proq yordamim kerak bo‘lyapti. Hali, ko‘rasiz bular UFCni “yondiradi”!
 

Ma’lumot uchun, Jamshid Tagiev 1990 yil 31 dekabrda Samarqand shahrida tavallud topgan. 1998 yildan sport faoliyatini boshlagan. U boks, kikboksing va muaytay sir-asrorlarini mukammal o‘rgangan va ko‘p faoliyatini Tailanda o‘tkazgan. U havaskor yo‘nalishda kikboksing va muaytay bo‘yicha ko‘p karra O‘zbekiston chempioni, bir qancha xalqaro turnirlar g‘olibi bo‘lishga erishgan. Professional muaytay va kikboksing yo‘nalishida 100 dan ortiq janglar o‘tkazgan.