"Jenoa" faqat "Yuventus"dan ortda qoldi

"Jenoa" Italiya A Seriyasi 21-turi doirasida "Napoli"ni qabul qildi va 2:1 hisobida g‘alaba qozondi. E’tiborlisi, Davide Ballardini genuyaliklar boshqaruviga qaytgach, jamoa so‘nggi 8 turda 17 ochko jamg‘arishga erishdi.

Ushbu vaqt oralig‘ida faqatgina "Yuventus" (18 ochko) "Jenoa"dan ko‘p ochko jamg‘argan. Ammo shuni qayd etish kerakki, Ballardini shogirdlari so‘nggi 8 uchrashuvda 5 ta gol o‘tkazdi xolos. Bu esa ligadagi eng yaxshi ko‘rsatkich bo‘lib turibdi.

21 uchrashuvda 24 ochko jamg‘argan "Jenoa" turnir jadvalida 12-o‘ringa ko‘tarilib oldi. Jamoa Ballardini kelgan sana, 21 dekabrda 19-o‘rinda borayotgan edi.