Жезусга АПЛдан иккита иш чиқди

Лондоннинг «Арсенал» жамоаси ҳужумчиси Габриэл Жезусга Англия премьер-лигасининг бир қатор клублари қизиқиш билдирмоқда.

Sky Sports News хабарига кўра, яқин кунларда бразилиялик футболчи бўйича «Эвертон» ва «Ипсвич» клублари расман сўров йўллаган. Маълумотларга қараганда, 29 ёшли форвард агар «Арсенал»ни тарк этса, фаолиятини айнан Англия чемпионатида давом эттиришни афзал кўрмоқда.

Габриэл Жезусга бўлган қизиқиш фақат Англия билан чекланиб қолмаяпти. Унга Италиянинг «Наполи» клуби ҳам даъвогар сифатида тилга олинмоқда. 

Transfermarkt портали футболчининг бозор қийматини 17 миллион евро атрофида баҳоламоқда. Унинг «канонирлар» билан амалдаги шартномаси келаси йил ўрталарида ўз ниҳоясига етади.