Жозеф Паркер рингга қайтмоқда!

Янги Зелландиялик Жозеф Паркер (36-4, 24 КО) бир пайтлар Александр Усикни мағлуб этиши мумкин бўлган ягона рақиб сифатида тилга олинарди. Бироқ унинг ғалабали серияси ўтган йил октябрь ойи охирида Фабио Уордлига қарши жангда тўхтади. Ўша кечада янги зеландиялик боксчи 11 раундда техник нокаут эвазига мағлубиятга учради.

Шундан сўнг Паркер билан яна бир жиддий муаммо юзага келди: унинг танасида кокаин излари аниқлангач, боксчи маълум муддатга мусобақалардан четлатилди. Шу тариқа, оғир вазн тоифасида собиқ жаҳон чемпионининг рингдаги фаолияти вақтинча тўхтаб қолди.

Аммо бугун вазият кескин ўзгармоқда. Жозефга қўйилган дисквалификация шартли равишда бекор қилинди ва у яна профессионал боксга қайтиш имкониятига эга бўлди.

"Дисквалификациям бекор қилинганини тасдиқлашдан мамнунман ва яқин орада яна рингга қайтаман. Ҳозирча барча тафсилотлар тўлиқ келишилмагунча, бу ҳақда батафсил гапириш ҳуқуқига эга эмасман", — дея маълум қилди Паркер.