Карим келяпти, "Барса"ни ким тарк этади?

«Барселона» клуби «Боруссия Дортмунд» жамоаси ҳужумкор футболчиси Карим Адейемини сотиб олишга яқин турибди. Флориан Плеттенберг хабарига кўра, трансфер амалга оширилгандан сўнг каталонияликлар таркибдаги ўйинчилардан бири - Руни Барджи билан хайрлашиши мумкин.

Манба маълумотича, «Барселона» 24 ёшли Адейеми билан шахсий шартнома шартларини тўлиқ келишиб олган. Жамоа бош мураббийи Ханси Флик футболчи билан телефон орқали шахсан суҳбатлашиб, уни клуб лойиҳасига қўшилишга ишонтирган. 

Испания клуби Адейемининг тезкорлиги ва бир нечта ҳужум позициясида ўйнай олиш қобилиятини юқори баҳоламоқда. Ҳозирча «Барселона» ва «Боруссия» ўртасида трансфер тўлови миқдори юзасидан музокаралар давом этмоқда.

Адейемининг немис клуби билан амалдаги шартномаси 2027 йилгача мўлжалланган. Футболчининг уни узайтириш нияти йўқ, бу эса эҳтимолий ўтиш жараёнини анча осонлаштирмоқда. 20 ёшли швед вингери Барджи ўтган мавсумда «Барселона» таркибида 28 ўйин ўтказиб, 2 та гол урди ва 4 та голли узатма муаллифига айланди.