Конате учун ПСЖ, "Реал" ва "Бавария" курашмоқда

"Ливерпуль" ҳимоячиси Ибраима Конате бир қатор топ-клублар қизиқиш доирасига тушди.

Аввалроқ 27 ёшли футболчи "қизиллар" билан янги шартнома бўйича келишувга эриша олмагани ва жамоани эркин агент сифатида тарк этиши мумкинлиги ҳақида хабарлар тарқалган эди.

L’Equipe маълумотига кўра, француз футболчисига яқин манбалар музокаралар тўхтаб қолганини ва томонлар келишувга эриша олмаслигини айтмоқда.

Нашрнинг таъкидлашича, бундай вазият "Ливерпуль"нинг омадсиз мавсуми ортидан клуб ичида юзага келган келишмовчиликлар сабабли пайдо бўлган. Хусусан, Конатенинг шартнома тузилиши ва маош миқдори борасида фикрлар турлича бўлган.

Аввалроқ ҳимоячини қўлга киритиш учун асосий даъвогар ПСЖ экани айтилганди. Шунингдек, L’Equipe маълум қилишича, "Реал", "Бавария" ва "Челси" ҳам футболчи учун курашга қўшилади.

Франция терма жамоаси аъзоси ўз келажаги бўйича қарорни ЖЧ–2026 бошланишидан олдин қабул қилиши кутилмоқда.