Кубок учрашувида 44 та пенальти тепилди

Италия кубоги доирасида кутилмаган ҳолат рўй берди – кейинги босқичга чикувчи жамоани аниқлаш учун икки клуб биргаликда 44 та пенальти амалга оширишга мажбур бўлди. Гап «Эболитана» ва «Сарнезе» ўртасидаги баҳс ҳақида кетмоқда.

Узоққа чўзилган пенальти сериясида асабларини яхшироқ назорат қилган «Эболитана» ғалаба қозонди. Салерно шаҳри клуби шу тариқа кейинги босқич йўлланмасига эга чиқди. Қизиғи шундаки, жамоа 2026 йилда ўзининг юз йиллик юбилейини нишонлайди ва ушбу муваффақият клуб учун рамзий аҳамият касб этмоқда. Кейинги босқичда «Эболитана» «Ночерина»га қарши майдонга тушади.

Шу билан бирга, 44 та пенальти – бундай турдаги дуэллар учун мутлақ рекорд эмас. 2024 йилда Исроил кубоги мусобақасида «Димона» ва «Шимсон» жамоалари ўртасидаги учрашув янада драматик тарзда якунланган эди. Ўшанда рақиблар бир-бирларига жами 56 та пенальти ижро этишган, фақат шундан сўнггина кейинги босқичга чиқувчи жамоа номи маълум бўлган.