Кутилмаганда Родри олдида "Барселона" варианти пайдо бўлди

«Манчестер Сити»нинг марказий ярим ҳимоячиси Родри яқин вақтларда жамоани тарк этиб, яна Испанияга қайтиши мумкинлиги ҳақида хабарлар кўпайди. 

Охирги соатлар, кунлар ва ҳафталар давомида матбуотда унинг «Реал» сафига ўтиши эҳтимоли кенг муҳокама қилинди. 

Шу билан бирга, El Nacional нашрида чоп этилган мақолада таъкидланишича, агар Родри учун «Реал» варианти амалга ошмай қолса, 29 ёшли футболчи учун яна бир йўналиш сифатида «Барселона» кўриб чиқилиши мумкин.

Маълумки, «Барселона» ярим ҳимоячиси Френки де Йонг олган жароҳат жамоа марказидаги вазиятни жиддий ўзгартирди. Шу сабабдан бош мураббий Ханс-Дитер Флик энди юқори даражадаги янги ярим ҳимоячини жамоага қўшиб олиш эҳтимолини инкор этмаяпти.

Шу билан бирга, манба маълумотларига кўра, ҳозирча «Барселона» клуби Родри бўйича аниқ ҳаракатларни бошлагани ҳақида маълумот йўқ.