Ла Лига, Роналдуни кутиб ол!

Португалия терма жамоаси ва “Ан-Наср” ҳужумчиси Криштиану Роналду Испания чемпионатига кириб бориши кутилмоқда. 40 ёшли футболчи ўзига “Валенсия” клубини сотиб олишга тайёргарлик кўряпти.

Footmercato нашрининг маълум қилишича, “Валенсия”нинг ҳозирги хўжайини Питер Лим клуб акцияларини Роналдуга сотишга қарор қилган.

Петер Лим анчадан бери Криштиану билан ҳамкорлик қилиб келади. Улар биргаликда бир неча компаниялар бошқарувига экалик қилади. Роналдунинг имидж ҳуқуқини айнан Петер Лим бошқаради.

Маълумотларга қараганда, Лим “Валенсия” акцияларини жорий мавсум охиригача сотувга қўяди. Роналдунинг ўзи бу савдога жиддий қизиқиш билдирмоқда. Харажатларнинг бир қисмини Саудия Арабистони инвестиция жамғармаси қоплаши келишилган.

“Валенсия” ҳозир қийин аҳволда. Жамоа Ла Лигада қолиш учун курашмоқда. Валенсияликлар айни пайтда хавфли ҳудуд – 18-поғонада жойлашган ва лигада қолиш учун “Лас-Пальмас”, “Леганес” ҳамда  “Алавес” билан рақобатлашяпти.