Легионеримиз клубини тарк этди. Уни бошқа жамоада кутишяпти

Қўшни Қирғизистон чемпионатида бир талай ўзбек футболчилари тўп суриб келишяпти. Уларнинг аксарияти эса ўз жамоаларида етакчилар ролида кўриниш бермоқдалар. Жумладан, “ОшМУАлдиер” жамоаси таркибида ҳам бир қатор легионерларимиз фаолият олиб бормоқдалар. Уларнинг орасида 22 ёшли  ҳужумкор ярим ҳимоячи Саидумар Содиқов алоҳида ажралиб турибди. Шунинг учун унинг хизматига талабгорлар кўпайиб боряпти.

Содиқов жорий йил бошида “ОшМУАлдиер” сафига қўшилган бўлиб, ҳозиргача 10 та ўйинда майдонга тушиб, рақиблар дарвозасига 3 та гол урди ҳамда 3 та ассистни амалга оширди. Шунингдек, икки марта учрашувнинг энг яхши футболчисига ҳам сазовор бўлди. Бироқ жамоасининг натижалари кўнгилдагидек эмас. Чунки “ОшМуАлдиер” мусобақада 10 та жамоа орасида 7 очко билан сўнгги ўринни эгаллаб турибди.

Мухлислар меҳрини қозонган Саидумар Содиқов эса шартнома муддати якунига етгани сабабли клубни тарк этди. Бизга маълум бўлишича, унинг хизматига Қирғизистоннинг етакчи клублари – “Дордой” ҳамда “Нефтчи” (Қўчқор Ота) жиддий қизиқиш билдиришмоқда. Бу хабарни футболчининг ўзи ҳам тасдиқлади. Якунда иккисидан бирининг танловини амалга ошириши катта эҳтимол.

Аслида Саидумарда Чернонория чемпионатида тўп суриш имконияти ҳам бор эди. Гап шундаки, ўтган йилнинг охирларида унга Черногория клубидан аниқ таклиф келиб тушади ва томонлар ҳаммасини келишиб қўйгандилар. Бироқ ҳужжат ишларидаги муаммолар туфайли Содиқовнинг у ерга бориши чўзилиб кетди. Унгача эса футболчимизга “Металлург” клубидан ҳам қизиқиш бўлганди. У пайтда Содиқов “Андижон” клуби шарафини ҳимоя қилиб келаётганди. Режа бўйича Саидумар “Андижон”дан кетганидан сўнг Черногория чемпионатига кўчиб ўтиши кутилганди. Аммо юқоридаги сабаб туфайли футболчининг у ерга кўчиб ўтиши амалга ошмади. Шундан кейин жорий мавсум бошида Қирғизистон чемпионатига йўл олди. Содиқов билан боғлиқ воқеалар ривожини кузатишда давом этамиз.

Шуҳратбек Жўраев.