"Ливерпуль" турк юлдузини сотиб олади

Истанбулнинг «Бешиктош» жамоаси ярим ҳимоячиси ва сардори Оркун Кёкчю яқин вақтлар ичида Англиянинг етакчи клубларидан бирига йўл олиши мумкин. 

Бу ҳақда маълумотни ижтимоий тармоқлар орқали журналист Экрем Конур эълон қилди.

Манбанинг қайд этишича, футболчининг ўйинларини «Ливерпуль» жамоаси жиддий равишда кузатиб бормоқда. Шунингдек, Кёкчюга яна икки инглиз клуби ҳам қизиқиш билдирган, аммо уларнинг номи ҳозирча ошкор этилмаган.

25 ёшли ярим ҳимоячи қиймати Transfermarkt порталида 25 миллион евро атрофида баҳоланган. Унинг «Бешиктош» билан тузган шартномаси 2030 йил июн ойи охиригача амал қилади.

Жорий мавсум Туркия Суперлигасида Оркун Кёкчю олти ўйинда майдонга тушди. У шу вақт ичида бир гол урди ва икки бор ҳамжамоаларини голли пас билан таъминлади.