"Ливерпуль" Ван Дейкка ўринбосар қидирмоқда

«Ливерпул» жамоаси капитани Вирджил ван Дейк мавсум якунида клубни тарк этиб, эркин агент сифатида «Милан» сафига ўтиши кутилмоқда. Бу ҳақда италиялик журналист Карло Пеллегатти хабар берди. 35 ёшли голландиялик марказий ҳимоячи «Энфилд»да тўққиз йил ўйнаб, «Саутгемптон»дан келган пайтида дунёдаги энг қиммат ҳимоячига айланган эди. Ҳозирда ван Дейкнинг «Ливерпул» билан амалдаги шартномаси 2027 йил ёзигача мўлжалланган.

«Милан» эгаси Жерри Кардинале бу масалада ўз позициясини аниқ билдиргани айтилмоқда: «Ёки биз уни ҳозир пул эвазига оламиз, ёки келаси йили бепул қўлга киритамиз. Ван Дейк барибир эрта ёки кеч «Милан»га келади», — дея Пеллегаттининг сўзларини келтиради манбалар.

CaughtOffside маълумотларига кўра, «Ливерпул» ван Дейкнинг ўрнига «Тоттенхэм» капитани Микки ван де Венни асосий номзод сифатида кўриб чиқмоқда. 25 ёшли ҳимоячи Нидерландия терма жамоасида ҳам ван Дейк билан бирга ўйнайди ва чап қанот ҳимоячиси сифатида ҳам ҳаракат қила олади. Бу эса «қизиллар» учун муаммоли деб ҳисобланган позицияни ёпиш имконини беради. Ван де Веннинг «Тоттенхэм» билан шартномаси 2031 йилгача амал қилади, унинг трансфер қиймати тахминан 50 миллион евро атрофида баҳоланмоқда. Голландиялик ҳимоячига «Манчестер Юнайтед» клуби ҳам жиддий қизиқиш билдирмоқда.