Магомед Анкалаевнинг навбатдаги рақиби ойдинлашмоқда

Ярим оғир вазнда UFC собиқ чемпиони Магомед Анкалаев 12 декабрь куни Лас-Вегасда ўтадиган "UFC 335" турнирида октагонга қайтишни режалаштирмоқда. Унинг эҳтимолий рақиби ўрта вазн тоифасининг собиқ чемпиони Дрикус Дю Плесси бўлиши мумкин. Бу ҳақда россиялик жангчи Азамат Бостановга берган интервьюсида маълум қилди.

"Биз декабрь ойида "UFC 335" турнирида жанг қилишни режалаштиряпмиз. Ҳозирча кутяпмиз. Гап-сўзларга кўра, Дрикус Дю Плесси юқори вазнга кўтарилмоқчи ва мен билан жанг ташкил қилиниши мумкин. Айни пайтда менда бор маълумот шу, бошқа янгилик йўқ.

У оғир баҳсларни бошдан кечирган, характери бор йигит. Мен учун ҳам бу қизиқ тўқнашув бўлади. Ҳозир ҳамма юқори вазнга чиқяпти, ҳеч ким вазн ташлашни истамаяпти. Бу ерда тобланган, тажрибали жангчилар йиғилган. Уиттакер юқори вазнга чиқиб Криловни мағлуб этди. Коста эса Мурзакановдан устун келди. Менимча, дивизионимиздаги энг қизиқ воқеалар ҳали олдинда", — деди Магомед.

Эслатиб ўтамиз, Магомед Анкалаев "UFC Abu Dhabi" турнирида Богдан Гуськовни бешинчи раундда техник нокаутга учратганди. Дрикус Дю Плесси эса сўнгги жангида Камару Усманни ҳакамларнинг якдил қарори билан мағлуб этди.